Ukrayna Rusiyada iki neft emalı zavoduna hücum edib
Ukrayna pilotsuz uçuş aparatları (PUA) ilə Rusiyanın Krasnodar diyarına hücum edib. Hücum nəticəsində iki müəssisənin ərazisində yanğın baş verib.
Crossmedia.az xəbər verir ki, bu barədə Rusiyanın Krasnodar diyarının Operativ Qərargahı məlumat yayıb.
Bildirilib ki, noyabrın 18-nə keçən gecə pilotsuz uçuş aparatlarının qalıqlarının düşməsi nəticəsində iki müəssisənin ərazisində yanğın başlayıb. Rusiya rəsmiləri həmin müəssisələrin adlarını açıqlamayıblar.
Ukraynanın monitorinq resurslarının məlumatına görə, hücumun hədəfi Severski rayonunda yerləşən Afipski və İlski neft emalı zavodları olub.
Krasnodardan təxminən 16 kilometr məsafədə yerləşən Afipski qəsəbəsinin sakinləri Puşkin küçəsində partlayış baş verdiyini və xəsarət alanların olduğunu bildiriblər.
Hücumun vurduğu ziyanın miqyası barədə hələlik dəqiq məlumat yoxdur. Hər iki neft emalı zavodunun birbaşa vurulması ilə bağlı məlumatlar rəsmi şəkildə təsdiqlənməyib.
10:59 18.11.2026
Oxunuş sayı: 96