Krım körpüsünün bir hissəsi çöküb – Gəmilərin hərəkəti məhdudlaşıb
Ukraynanın Krım körpüsünə endirdiyi növbəti zərbələrdən sonra körpünün avtomobil yolu hissəsində tağın və onun altındakı aşırımın çökdüyü bildirilir.
Crossmedia.az xəbər verir ki, Ukraynanın "UNN" agentliyi bu barədə məlumat yayıb.
Məlumata görə, noyabrın 17-nə keçən gecə Kerç körpüsü yenidən hücuma məruz qalıb. Zərbələr nəticəsində körpünün avtomobil yolu hissəsində ciddi dağıntıların yarandığı iddia edilir.
Yayılan foto və videomateriallarda körpünün tağ konstruksiyasının və onun altındakı aşırımın çökdüyü görünür.
Monitorinq mənbələrinin məlumatına görə, dağılan konstruksiyaların qalıqları Kerç boğazındakı gəmiçilik kanalını da bağlayıb. Nəticədə gəmilərin hərəkətinin məhdudlaşdırıldığı bildirilir.
Ukrayna mediası və açıq mənbələr üzrə araşdırma aparan analitiklər körpünün avtomobil yolu hissəsinin ciddi zədələndiyini qeyd edirlər.
Bununla belə, dağıntıların dəqiq miqyası və Kerç boğazında gəmiçiliyin tam dayanması barədə məlumatlar hələlik rəsmi şəkildə təsdiqlənməyib.
Qeyd edək ki, noyabrın 16-da da Krım körpüsünə hücum edildiyi bildirilmişdi. Krımın Rusiya tərəfindən təyin edilmiş rəhbəri Sergey Aksyonov həmin hücumdan sonra avtomobillərin hərəkətinin məhdudlaşdırıldığını açıqlamışdı.
11:23 17.11.2026
Oxunuş sayı: 104