ABŞ Yaxın Şərqə üçüncü təyyarədaşıyan gəmisini göndərib
ABŞ-nin "USS Theodore Roosevelt" təyyarədaşıyan gəmisi Yaxın Şərqə çatıb. Bununla da regionda ABŞ-yə məxsus təyyarədaşıyan zərbə qruplarının sayı üçə yüksəlib.
Crossmedia.az xəbər verir ki, "The National" nəşri bu barədə məlumat yayıb.
Məlumata görə, "USS Theodore Roosevelt" noyabrın 15-də ABŞ Mərkəzi Komandanlığının (CENTCOM) məsuliyyət zonasına daxil olub.
Gəmi hazırda regionda yerləşən "USS George Washington" və "USS George H.W. Bush" təyyarədaşıyan gəmilərinə qoşulub.
"USS Theodore Roosevelt"in əvvəlcə "USS George Washington" gəmisini əvəzləməsi nəzərdə tutulsa da, sonuncu hələlik regionda qalır.
Beləliklə, ABŞ Yaxın Şərqdə eyni vaxtda üç təyyarədaşıyan zərbə qrupu saxlayır.
Yeni hərbi qüvvələrin regiona göndərilməsi Vaşinqtonla Tehran arasında gərginliyin davam etdiyi dövrə təsadüf edir.
Məlumata əsasən, ABŞ-nin regiondakı hərbi mövcudluğunun gücləndirilməsi İranla bağlı mümkün hərbi əməliyyatların yenidən başlanması ətrafında müzakirələrin davam etdiyi şəraitdə baş verir.
Üç təyyarədaşıyan zərbə qrupunun regionda nə qədər müddət qalacağı hələlik məlum deyil.
11:20 16.11.2026
Oxunuş sayı: 135