Elektrik şəbəkəsinə qoşulma artıq daha asan: Onlayn xidmətlər vətəndaşların istifadəsində
Nazirlər Kabinetinin qərarına əsasən, tikinti obyektlərinin elektrik şəbəkəsinə qoşulması və ya əlavə enerji (güc) alması ilə bağlı qaydalarda yeni prosedurlar müəyyən edilib. Bu yeniliklər, xüsusilə onlayn müraciət imkanları ilə fərqlənir. Vətəndaşlar “Azərişıq” ASC-nin yaratdığı informasiya sistemi vasitəsilə, həmçinin e-gov.az və e-service.azerishiq.az portalları üzərindən müraciətlərini daha rahat şəkildə həyata keçirə bilərlər.
Bu addımın məqsədi həm xidmətlərin şəffaflığını təmin etmək, həm də vətəndaşların vaxtını və resurslarını qənaətlə istifadə etməsinə imkan yaratmaqdır. Onlayn sistemlər vasitəsilə müraciət prosedurları, tələb olunan sənədlər və şəbəkəyə qoşulma şərtləri barədə ətraflı məlumat almaq mümkündür.
İqtisadçı ekspert Emin Qəribli bu yeniliklərlə bağlı Crossmedia.az-a açıqlamasında bildirib ki, elektrik şəbəkəsinə qoşulma prosesinə həm yazılı, həm də elektron formada müraciət edildiyi təqdirdə, üç gün ərzində icra olunması mümkündür. Onun sözlərinə görə, maksimum on gün ərzində şəbəkəyə qoşulma tamamlana bilər: “Şəbəkənin yerləşmə şəraiti və məsafə kimi xüsusi hallarda bu müddət bir qədər uzana bilər. Lakin statistik göstəricilərə əsasən, bu proses orta hesabla 7 gün ərzində başa çatır. Prosesin effektivliyini təmin etmək üçün müasir avadanlıqlar və texnologiyalar tətbiq olunur və daim təkmilləşdirilir”.
Bir vaxtlar uzun müddət tələb edən bu proseslər, bu gün beynəlxalq təcrübələrə uyğun şəkildə daha sürətli və şəffaf həyata keçirilir. Emin Qəribli vurğulayıb ki, “Azərişıq” ASC üzərinə düşən vəzifələri yüksək səviyyədə icra edir və bu sahədə davamlı inkişaf üçün müasir texnologiyaları tətbiq etməkdədir.
Ekspert əlavə edib ki, bu təkmilləşdirmələrin məqsədi beynəlxalq biznes mühitində Azərbaycanın mövqeyini daha da gücləndirməkdir. Bu məsələlərdə müsbət dinamikaya malik olmaq, biznes mühitinin inkişafı və beynəlxalq reytinqlərdə mövqeyi yaxşılaşdırmaq üçün Biznes Mühiti və Beynəlxalq Reytinqlər üzrə Komissiya çalışmalar həyata keçirir. Komissiyanın Elektrik təchizatı şəbəkələrinə qoşulma işçi qrupu sözügedən istiqamətdə xüsusi tədbirlər görür. Çünki elektrik şəbəkəsinə qoşulma prosesi beynəlxalq reytinqlərdə mühüm əhəmiyyət daşıyan göstəricilərdən biridir.
Sahibkarlar arasında aparılan sorğular nəticəsində məlum olub ki, elektrik şəbəkəsinə qoşulma xidmətlərindən sahibkarlar böyük məmnunluq hissi keçirirlər. Beynəlxalq təşkilatlar da bu sahədə Azərbaycanın əldə etdiyi nailiyyətləri yüksək qiymətləndirir.
Beləliklə, yeni tətbiq edilən prosedurlar sayəsində həm vətəndaşlar, həm də sahibkarlar üçün elektrik şəbəkəsinə qoşulma daha əlçatan və sürətli olub. Azərbaycanın bu sahədə əldə etdiyi üstünlüklər ölkənin beynəlxalq mövqelərinə də müsbət təsir göstərir.
Crossmedia.az-a elektron prosedurların tətbiqi ilə bağlı UNEC eksperti Yalçın Köçərli də öz fikirlərini bölüşüb. Ekspert bildirib ki, bu yeniliklər vətəndaşların vaxtına və resurslarına qənaət etməklə yanaşı, onların müraciətlərinin operativ həllinə şərait yaradır: “Yeni prosedurların və rəqəmsal xidmətlərin tətbiqində əsas məqsəd əhali və qeyri-əhali qruplarının müraciətlərinin operativ cavablandırılmasını, bürokratik maneələrin aradan qaldırılmasını və istehlakçı məmnunluğunun artırılmasını təmin etməkdir. Nəticədə enerji resurslarından səmərəli istifadə edilərək enerji effektivliyi artırılır, energetika subyektləri ilə istehlakçıların maraqları arasında balans qorunur”.
Y.Köçərli əlavə edib ki, Azərbaycanın enerji sektorunda tətbiq edilən rəqəmsal idarəetmə sistemi ümumi enerji infrastrukturunun optimallaşdırılmasına mühüm töhfə verir: “Azərbaycanda tətbiq olunan Smart Grid texnologiyaları elektrik şəbəkələrinin idarəetmə və monitorinqində müasir yanaşmaları özündə birləşdirir”.
Yalçın Köçərli qeyd edir ki, bu konsepsiya enerji təchizatında yüksək etibarlılıq, təhlükəsizlik və iqtisadi səmərəliliyin təmin edilməsinə yönəlib: “Smart Grid texnologiyası müasir idarəetmə, monitorinq və məlumatlandırma texnologiyalarını əhatə edərək, enerji istehsalçısından istehlakçıya qədər bütün proseslərin optimallaşdırılmasını təmin edir. Bu sistemlərdə SCADA texnologiyasından istifadə olunur ki, bu da məlumatların toplanması, dispetçer idarəetməsi və enerji şəbəkələrinin operativ idarə olunmasında əsas platforma rolunu oynayır”.
Elektrik təchizatı şəbəkəsinə qoşulma prosesinin rəqəmsallaşdırılması çərçivəsində təqdim edilən xidmətlər arasında abonent kodunun aktiv və passiv edilməsi, tarixçə məlumatlarının verilməsi, borclarla bağlı sənədlərin təqdim edilməsi, yaşayış binalarının qeydiyyata alınması, layihələndirmə və quraşdırma işləri, enerji şəbəkəsinə qoşulma və digər çoxsaylı funksiyalar mövcuddur.
Elektron Hökumət Portalları vasitəsilə “Azərişıq” ASC tərəfindən təmin edilən xidmətlər abonentlərə vaxt itkisindən qaçmaq və müraciətlərin operativ həllində mühüm imkanlar yaradır. Yalçın Köçərli bu xidmətləri yüksək qiymətləndirərək bildirib: “Elektrik təchizatı şəbəkəsinə qoşulma ilə bağlı tələb olunan bütün məlumatlar, o cümlədən yeni qaydalar, xidmətlərin kalkulyatorları və digər zəruri detallar Azərişıq ASC-nin rəsmi internet səhifəsində geniş şəkildə təqdim olunur. Bu addımlar müştəri məmnuniyyətinin artırılmasına yönəldilmişdir.”
Onun sözlərinə görə Azərbaycanın beynəlxalq biznes mühitində reytinqlərini artırmaq məqsədilə “Azərişıq” ASC tərəfindən enerji resurslarından səmərəli istifadə təmin edilir. Bu məqsədlə Biznes Mühiti və Beynəlxalq Reytinqlər üzrə Komissiyanın Elektrik təchizatı şəbəkələrinə qoşulma işçi qrupu tərəfindən irəli sürülən tövsiyələr əsasında bir çox strukturlaşdırılmış tədbirlər həyata keçirilir: “Tənzimləyici çərçivələr və elektron xidmətlərin operativliyi vətəndaşlara və sahibkarlara elektrik təchizatı şəbəkəsinə qoşulmada şəffaflıq və sürət təmin edir. Bu yanaşma eyni zamanda ölkəmizin dayanıqlı enerji siyasətinin əsas istiqamətlərindən biridir.”
Yeni prosedurlar və rəqəmsal texnologiyalar sayəsində Azərbaycanın enerji sektorunda əldə edilən irəliləyişlər həm vətəndaşların, həm də sahibkarların məmnuniyyət səviyyəsini yüksəldir. Bu tədbirlər ölkəmizin beynəlxalq mövqelərinin möhkəmləndirilməsinə də mühüm töhfə verir.
Nihat Tahirov
11:16 10.01.2025
Oxunuş sayı: 18256
