Yaşlı nəsildə yuxusuzluq demensiyanın əlaməti ola bilər
Yaşlı nəsildə yuxusuzluq inkişaf edən demensiyanın ilkin əlaməti ola bilər.
Bu barədə Crossmedia.az “aif.ru”saytına müsahibə verən terapevt-həkim Nadejda Çernışovanın sözlərinə istinadən xəbər verir.
Onun sözlərinə görə, bu yuxu pozğunluğu stress səbəbindən sinir sisteminin həddindən artıq yüklənməsi ilə əlaqələndirilir.
“Yuxusuzluq sağlamlıq problemlərinə səbəb ola biləcək yuxu pozğunluğudur. O, həm müstəqil xəstəlik, həm də digər xəstəliklərin əlaməti kimi özünü göstərə bilər,” – deyə həkim bildirib.
Belə pozğunluğa gecə növbəsində işləmək, növbəli iş rejimi və ya tez-tez vaxt zonalarının dəyişməsi, məsələn, uçuşlar zamanı səbəb ola bilər.
Həkim diqqətə çatdırıb ki, yuxu pozğunluğu qalxanabənzər vəzi xəstəliklərinin simptomlarından biri ola bilər. O qeyd edib ki, qadınlarda yuxuya getməkdə çətinlik müəyyən hormonal dəyişiklik dövrləri ilə bağlı ola bilər. Bunlara cinsi yetkinlik, hamiləlik, menopauza və ya klimakterik dövr daxildir.
Bundan əlavə, bəzi hallarda yuxusuzluq psixi xəstəliklərin təzahürü ola bilər. Belə bir problem şizofreniya, bipolyar pozuntu, həyəcan pozğunluğu və ya depressiya zamanı müşahidə olunur.
Gültac Mehdizadə
15:01 09.01.2025
Oxunuş sayı: 3945
