BMT məruzəçisi: İsrailin jurnalistlərə hücumları “mediakırım”dır
BMT-nin Fələstin üzrə xüsusi məruzəçisi Françeska Albanese İsrailin Qəzza zolağında jurnalistlərə qarşı hücumlarının və media üzərində təzyiqlərinin soyqırımın həyata keçirilməsini asanlaşdırdığını bildirib. O, bu halları “mediakırım” anlayışı ilə xarakterizə edib.
Crossmedia.az xəbər verir ki, bu barədə Albanesenin BMT Baş Assambleyasına təqdim etdiyi “Dağıntılar altında həqiqət: Soyqırım dövründə media” adlı hesabatda qeyd olunub.
Hesabatda İsrailin fələstinli jurnalistləri öldürdüyü, yaraladığı, saxladığı və işgəncələrə məruz qoyduğu, həmçinin senzura tətbiq etdiyi bildirilib. Sənəddə beynəlxalq media qurumlarının və rəqəmsal platformaların da fələstinlilərin səsini arxa plana keçirdiyi və İsrailin mövqeyini önə çıxardığı iddia olunur.
Qəzzada yüzlərlə jurnalistin öldürüldüyü bildirilir
Hesabata görə, 2023-cü ilin oktyabrından etibarən İsrailin hücumları nəticəsində təxminən 300 jurnalist öldürülüb, 400-dən çoxu yaralanıb. Həlak olan jurnalistlərin təxminən 70-nin peşə fəaliyyətini yerinə yetirərkən öldürüldüyü qeyd edilib.
Sənəddə, həmçinin jurnalistlərin 710 yaxınlarının öldürüldüyü, 150-dən çox jurnalistin evinin dağıdıldığı bildirilir. Hesabatda 2025-ci ilin oktyabrına qədər xəbər agentliklərinin qərargahları, yayım qüllələri və radio stansiyaları da daxil olmaqla, 150 media ofisinin dağıdıldığı, Qəzzanın rabitə infrastrukturunun 81 faizinin məhv edildiyi iddia olunur.
Jurnalistlərin saxlanılması və işgəncə iddiaları
Hesabatda 100-dən çox jurnalistin qaçırıldığı və ya saxlanıldığı, onların işgəncə, cinsi zorakılıq və pis rəftara məruz qaldıqları barədə məlumatlar yer alıb. Sənəddə İsrailin saxlanılan jurnalistləri “HƏMAS agentləri” kimi təqdim etməklə onlara qarşı hərəkətlərinə haqq qazandırmağa çalışdığı da iddia edilir.
Media və rəqəmsal platformalara dair ittihamlar
Albanesenin hesabatında İsrailin ənənəvi media qurumlarına və sosial şəbəkələrə təzyiq göstərərək Qəzzadakı hadisələrlə bağlı məlumatların yayılmasını məhdudlaşdırmağa çalışdığı bildirilir. “Project Esther” kampaniyası çərçivəsində “Google” və “X” də daxil olmaqla şirkətlərlə təxminən 50 milyon dollar dəyərində müqavilələrin imzalandığı qeyd olunur.
Hesabatda, həmçinin bəzi İsrail mediasında fələstinliləri insanlıqdan kənarlaşdıran ifadələrin işlədildiyi, Qəzzaya hücumları təşviq edən çıxışlara yer verildiyi iddia olunur. BBC, “The New York Times”, CNN və “The Washington Post” kimi media qurumlarının da İsrail rəhbərliyinin mövqeyini ön plana çıxardığı və fələstinlilərin səslərini məhdudlaşdırdığı irəli sürülür.
BMT-yə müstəqil araşdırma mexanizmi yaratmaq çağırışı
Hesabatda BMT Baş Assambleyasına jurnalistlərə qarşı törədilən cinayətlərə dair sübutları qorumaq üçün müstəqil mexanizm yaratmaq təklif olunur. İsrailə jurnalistlərə hücumları dayandırmaq, özbaşına saxlanılan şəxsləri azad etmək və beynəlxalq media nümayəndələri ilə insan hüquqları müşahidəçilərinin Qəzzaya girişinə icazə vermək çağırışı edilir.
Sənəddə dövlətlərdən jurnalistlərə qarşı hücumları araşdırmaq, məsul şəxsləri məhkəmə qarşısına çıxarmaq və soyqırımın qarşısının alınması ilə bağlı öhdəliklərini yerinə yetirmək tələb olunur.
01:20 28.10.2026
Oxunuş sayı: 67
