Mədəniyyət
98 illik fasilədən sonra “Turandot” yenidən Azərbaycan səhnəsində
İtalyan bəstəkar Cakomo Puççininin “Turandot” operası 98 ildən sonra yenidən Azərbaycanda səhnələşdirilib. Oktyabrın 24-də Heydər Əliyev Sarayında Azərbaycan Dövlət Akademik Opera və Balet Teatrının hazırladığı tamaşanın premyerası keçirilib.
Crossmedia.az Nazirliyə istinadən xəbər verir ki, Premyeranı Heydər Əliyev Fondunun vitse-prezidenti Leyla Əliyeva da izləyib.
Operanın quruluşçu rejissoru Mikayıl Mikayılov, quruluşçu rəssamı Mustafa Mustafayev, icraçı rəssamı Əməkdar mədəniyyət işçisi Tehran Babayev, rejissoru isə Elnur İsmayılovdur.
Tamaşanın xor hissəsini Əməkdar artist Sevil Hacıyeva hazırlayıb. Xoreoqrafiya üzərində Xalq artisti Mədinə Əliyeva və Əməkdar artist Anar Mikayılov çalışıblar.
Üç premyera axşamında tamaşa fərqli solistlərin və dirijorların iştirakı ilə təqdim olunur. Turandot və Kalaf rollarını hər axşam müxtəlif ifaçılar canlandırırlar.
Oktyabrın 24-də Kalaf rolunu Azərbaycan Dövlət Akademik Opera və Balet Teatrının direktoru, Xalq artisti Yusif Eyvazov ifa edib.
Tamaşadan əvvəl jurnalistlərə açıqlama verən Yusif Eyvazov operanın 98 ildən sonra Azərbaycan səhnəsinə qayıtmasını tarixi hadisə adlandırıb.
O bildirib ki, Mikayıl Mikayılov və Mustafa Mustafayevin hazırladığı yeni quruluş yüksək səviyyədədir. Tamaşada azərbaycanlı sənətçilərlə yanaşı, xarici opera solistləri də iştirak edəcəklər.
Quruluşçu rejissor Mikayıl Mikayılov isə teatr kollektivinin tamaşanın hazırlanmasına böyük əmək sərf etdiyini vurğulayıb.
“Ümid edirik ki, tamaşaçılar səylərimizi qiymətləndirəcək və tamaşadan zövq alacaqlar. Bu, teatr mədəniyyətimiz üçün böyük dəyərə malik çox əlamətdar hadisədir”, – deyə rejissor bildirib.
Qeyd edək ki, “Turandot” Cakomo Puççininin ən məşhur operalarından biridir. Üçpərdəli əsər Karlo Qozzininin eyniadlı pyesi əsasında hazırlanıb. Operanın librettosunun müəllifləri Cüzeppe Adami və Renato Simonidir.
Əsərin dünya premyerası 1926-cı il aprelin 25-də Milanın “La Skala” teatrında Arturo Toskanininin dirijorluğu ilə keçirilib.
Azərbaycan tamaşaçıları isə operanı ilk dəfə 1928-ci ildə izləyiblər. Bakıdakı həmin tamaşa Sovet İttifaqında “Turandot” operasının ilk səhnə təqdimatı olub.
Operanın süjeti şahzadə Turandot və Kalafın sevgi hekayəsindən bəhs edir. Turandot onunla evlənmək istəyən namizədlərə üç tapmaca verir. Bütün tapmacaları düzgün cavablandıran şəxs onunla evlənmək hüququ qazanır, səhv cavab verən isə edam edilir.
Kalaf bütün tapmacaların cavabını tapır və sonda Turandot onun sevgisini qəbul edir.
Premyera tamaşaçılar tərəfindən alqışlarla qarşılanıb.
10:27 26.10.2026
Oxunuş sayı: 52
