Qaraciyər piylənməsinin əsas səbəblərindən biri aşkarlandı
Barselona Universitetinin alimləri qaraciyərin piylənməsinin inkişafında rol oynaya bilən ENT1 adlı zülal müəyyən ediblər. Araşdırma göstərib ki, bu zülalın olmaması qaraciyəri piy yığılmasından, iltihabdan və toxuma zədələnməsindən qoruya bilər.
Crossmedia.az xəbər verir ki, "Metabolism" elmi jurnalı bu barədə araşdırmanın nəticələrini dərc edib.
Tədqiqatçılar hüceyrələrə müəyyən maddələrin daşınmasını təmin edən ENT1 zülalının fəaliyyətini araşdırıblar. Bu zülal iltihab proseslərini və hüceyrələrin stressə reaksiyasını tənzimləyən adenozin adlı birləşmənin daşınmasında iştirak edir.
Siçanlar üzərində aparılan təcrübələr göstərib ki, ENT1 zülalının olmaması qaraciyərdə adenozinin səviyyəsini azaldır, orqanda artıq piy toplanmasının, iltihabın və fibrozun qarşısını almağa kömək edir. Fibroz sağlam qaraciyər toxumasının çapıq toxuması ilə əvəz olunması prosesidir.
Bundan əlavə, həmin heyvanlarda insulinə həssaslığın artdığı və orqanizmin qanda qlükoza səviyyəsini tənzimləmək qabiliyyətinin yaxşılaşdığı müəyyən edilib.
Alimlər qaraciyərin piylənməsi xəstəliyindən əziyyət çəkən pasiyentlərin qaraciyər toxuması nümunələrini də təhlil ediblər.
Məlum olub ki, xəstəliyin ilkin mərhələlərində ENT1 geninin aktivliyi artır, xəstəlik irəlilədikcə isə azalır.
ENT1 aktivliyi daha yüksək olan pasiyentlərdə insulin səviyyəsinin artması və insulin müqavimətinin əlamətləri müşahidə edilib. Bu vəziyyətdə orqanizmin hüceyrələri insulin hormonuna zəif reaksiya verir.
Tədqiqat müəlliflərinin fikrincə, ENT1 zülalı gələcəkdə qaraciyərin piylənməsi xəstəliyinin müalicəsi üçün yeni hədəfə çevrilə bilər.
Hazırda bu zülalın fəaliyyətini zəiflədən preparatlar mövcud olsa da, onların sözügedən xəstəliyin müalicəsində effektivliyi hələ sübut edilməyib. Alimlərin nəticələri ilkin tədqiqatlara əsaslandığından insanlarda əlavə klinik araşdırmalara ehtiyac var.
Daha əvvəl aparılan başqa bir araşdırmada isə sirkənin tərkibindəki bəzi maddələrin qaraciyəri alkoqolun yaratdığı zədələnmələrdən qoruya biləcəyi müəyyən edilmişdi.
14:24 20.10.2026
Oxunuş sayı: 53
