Hörmüz boğazında yeni marşrut: İran və Oman razılığa gəldi
İran və Oman Hörmüz boğazından gəmilərin təhlükəsiz keçidi üçün tranzit marşrutları razılaşdırıb və bununla bağlı təkliflərini yaxın vaxtlarda beynəlxalq səviyyədə təqdim edəcəklər.
Crossmedia.az xəbər verir ki, İran Xarici İşlər Nazirliyinin sözçüsü İsmayıl Bağayi bu barədə məlumat yayıb.
Bağayinin sözlərinə görə, Tehran və Maskat arasında Hörmüz boğazından təhlükəsiz gəmiçilik üçün konkret mexanizmin yaradılması istiqamətində danışıqlar davam edir.
İran Xarici İşlər Nazirliyinin məlumatına əsasən, tərəflər gəmilərin boğaza giriş və çıxışı üçün təhlükəsiz marşrutların coğrafi koordinatları ilə bağlı razılığa gəliblər. Bu marşrutların beynəlxalq səviyyədə təqdim edilməsi nəzərdə tutulur.
Oman və İran daha əvvəl də boğazda müvəqqəti naviqasiya dəhlizinin yaradılması, daha sonra isə daimi marşrutun müəyyənləşdirilməsi və gəmiçilik təhlükəsizliyi üzrə birgə mexanizmin hazırlanması məsələsini müzakirə ediblər.
Hörmüz boğazı beynəlxalq dəniz daşımaları üçün mühüm strateji marşrut hesab olunur. İran və Oman boğazın sahilyanı dövlətləri kimi burada təhlükəsiz naviqasiyanın təmin edilməsinin vacibliyini vurğulayıblar.
10:39 08.10.2026
Oxunuş sayı: 228
