Səhhətində problemi olan insanlar bu yeməklərə üstünlük versinlər
Bayram hazırlıqları xalqımızın qədim adət-ənənələrinin ayrılmaz hissəsidir. Bayrama bir neçə gün qalmış alış-veriş başlayır və hər kəs xüsusi hazırlıq görür. Bayram süfrəsinə məsuliyyət isə hər bir insanın üzərinə düşür. Xüsusilə də səhhətində problemi olanlar qidalanmalarına daha diqqətlə yanaşmalıdırlar.
Mövzu ilə bağlı dietoloq Validə Şıxıyeva Crossmedia.az saytına bildirib ki, təzyiq və şəkər kimi sağlamlıq problemləri olan şəxslərə yağlı yeməklərdən, qazlı içkilərdən və şirniyyatlardan uzaq durmaq tövsiyə olunur.
"Məsələn, tərəvəz salatları yaxşı seçim ola bilər. Bu salatları mayonezlə deyil, xama və ya zeytun yağı ilə hazırlamaq məsləhətdir.
Eyni zamanda, sobada bişirilmiş ət, buğlama və ya balıq kimi daha yüngül yeməklər də menyuya daxil edilə bilər. Çox yağlı yeməklər və qidaların bir-birinə qarışdırılması həzm sistemində problemlər yarada bilər. Bu, hətta sağlam insanlarda da narahatlıqlara səbəb ola bilər".
Mütəxəssisin fikrincə, plovun üstünə qazlı içki, yağlı yeməklər, şirniyyat və meyvə kimi fərqli qidaları eyni anda qəbul etmək düzgün deyil:
"Qidaları az-az, növbəti günlərdə paylamaq daha məqsədəuyğundur, çünki bayram yalnız bir günlə məhdudlaşmır.
Səhhətində problemi olan insanlar tərəvəz salatlarına üstünlük verə və limonlu su içə bilərlər".
Dietoloq sonda əlavə edib ki, insan öz sağlamlığına məsuliyyətlə yanaşmalı, qidalanmasında balansı qorumalıdır:
"Müasir dövrdə sosial şəbəkələr və media vasitəsilə bu mövzuda kifayət qədər məlumat əldə etmək mümkündür. Hər kəs öz qidalanmasına diqqət yetirib sağlamlığını qorumağa çalışmalıdır".
Nərgiz Orucova
18:47 01.01.2025
Oxunuş sayı: 20417
