Təbiətlə təmas immuniteti gücləndirə bilər
Torpaq, mamır və bitkilərlə təmas insan dərisindəki mikrobların müxtəlifliyini artıraraq dəri və immun sistemi üçün faydalı ola bilər.
Crossmedia.az xəbər verir ki, bu barədə BBC məlumat yayıb. Finlandiya Ətraf Mühit İnstitutunun tədqiqatçısı Mira Grönroosun apardığı eksperiment zamanı insanlar əllərini 20 saniyə torpaq, torf və mamırla təmas etdiriblər. Nəticədə dəridəki mikroorqanizmlərin həm sayı, həm də müxtəlifliyi artıb.
Alimlər bildirirlər ki, dəridə zəngin mikroorqanizm müxtəlifliyi zərərli bakteriyaların qarşısının alınmasına və immun sisteminin dəstəklənməsinə kömək edə bilər. Təbiətdəki torpaq və bitkilərlə müntəzəm təmasın dəri mikrobiomunun müxtəlifliyini artırdığına dair araşdırmalar da mövcuddur.
Finlandiyada uşaqların sağlamlığı ilə bağlı daha geniş araşdırmalar da aparılır. Aurinkolinna uşaq bağçasında uşaqlar hər gün meşəlik ərazidə bir neçə saat oynayır, torpaq və ağac qırıntıları ilə təmasda olurlar. Tədqiqatçılar onların dəri, tüpürcək və bağırsaq mikroblarını, həmçinin qan və saç nümunələrini analiz edirlər.
2016-2017-ci illərdə aparılan başqa bir araşdırmada uşaq bağçasının həyətinə torf və bitkilərdən ibarət meşə döşəməsi gətirilib. Müəyyən müddətdən sonra həmin ərazidə oynayan uşaqların dərisində, asfalt həyətdə oynayan uşaqlarla müqayisədə daha yüksək mikrob müxtəlifliyi müşahidə olunub.
07:20 12.09.2026
Oxunuş sayı: 217
