Hindistanın Hanle kəndi ulduzları ilə turistləri cəlb edir
Hindistanın Ladax bölgəsində yerləşən Hanle kəndi dünyanın ən qaranlıq səma məkanlarından biri kimi turistlərin diqqətini çəkir. Burada gecələr Süd Yolu və saysız-hesabsız ulduzlar aydın şəkildə müşahidə olunur.
Crossmedia.az xəbər verir ki, bu barədə BBC məlumat yayıb. Dəniz səviyyəsindən 5 290 metr yüksəklikdə yerləşən Hanle Bortle qaranlıq səma şkalasında ən yüksək qaranlıq səviyyəsi olan “1” göstəricisinə malikdir. Ərazidə ildə təxminən 270 aydın gecə müşahidə olunur və yerli sakinlər ulduzların daha yaxşı görünməsi üçün gün batdıqdan sonra işıqları söndürürlər.
Son illərdə Hanleyə səfər edənlərin sayı artıb. Turistlər burada yalnız qaranlıq səmanı izləmək deyil, həm də yerli sakinlərin təşkil etdiyi astronomiya turlarında iştirak etmək imkanı əldə edirlər.
2022-ci ildə 1 074 kvadratkilometr ərazini əhatə edən Hanle Qaranlıq Səma Qoruğu yaradılıb. Qoruğa altı kənd, bir monastır və 10 stasionar teleskop daxildir. Yerli sakinlərin idarə etdiyi qonaq evləri və ulduz müşahidəsi turları da inkişaf edib.
Hanledə hər il sentyabr ayında “Star Party” adlı astronomiya tədbiri keçirilir. Festival Hindistanın müxtəlif bölgələrindən teleskop və xüsusi kameralarla gələn astronomiya həvəskarlarını və astrofotoqrafları bir araya gətirir.
05:45 12.09.2026
Oxunuş sayı: 51
