Çox isti çay və qəhvə xərçəng riskini artıra bilər
Çay və qəhvəni çox isti halda mütəmadi içmək qida borusu xərçəngi riskini əhəmiyyətli dərəcədə artıra bilər.
Crossmedia.az xəbər verir ki, Oksford Universiteti bu barədə araşdırma aparıb.
Beynəlxalq Xərçəng Jurnalında (“International Journal of Cancer”) dərc olunan tədqiqatda təxminən 1 milyon orta yaşlı insanın məlumatları araşdırılıb.
Nəticələrə görə, içkiləri “çox isti” qəbul edən şəxslərdə qida borusu xərçənginə tutulma riski içkilərini “isti” deyil, daha ilıq içənlərlə müqayisədə təxminən üç dəfə yüksək olub. Bununla belə, mütəxəssislər bu xərçəng növünə ümumi yoluxma ehtimalının aşağı olduğunu vurğulayırlar.
Tədqiqatçılar 977 282 kişi və qadının məlumatlarını təhlil ediblər. Gündə altı və ya daha çox isti içki qəbul edənlərdə də riskin artdığı müəyyənləşdirilib.
Araşdırmada temperaturu 65 dərəcə Selsi və daha yüksək olan içkilər “çox isti” hesab edilib.
Alimlərin fikrincə, həddindən artıq isti maye mədəyə gedərkən qida borusunun daxili hüceyrə qatına zərər verə bilər. İçkiyə süd əlavə etmək temperaturu müəyyən qədər aşağı salsa da, süd qatılmış çay və qəhvə belə sağlamlıq üçün çox isti ola bilər.
Tam qaynadılmış sudan hazırlanan çayın temperaturu təxminən 100 dərəcə Selsiyə çatır. Fincana töküldükdən sonra isə temperatur adətən 90-95 dərəcə Selsiyə qədər enir.
04:52 10.09.2026
Oxunuş sayı: 45
