Peskov: Kiyevin maliyyə və silah çatışmazlığı var
Rusiya Prezidentinin mətbuat katibi Dmitri Peskov Ukraynanın hazırda çox ağır vəziyyətdə olduğunu və Kiyevin maliyyə və silah çatışmazlığı yaşadığını bildirib.
Crossmedia.az xəbər verir ki, Kremlin mətbuat xidməti bu barədə məlumat yayıb.
Peskov bildirib ki, Rusiya Prezidenti Vladimir Putin və ABŞ Prezidenti Donald Tramp Asiya-Sakit Okean İqtisadi Əməkdaşlığı (APEC) sammiti çərçivəsində mümkün görüşü konkret şəkildə müzakirə etməyiblər. Bununla belə, belə bir görüşün keçirilə biləcəyi ilə bağlı anlayış var.
Kremlin sözçüsü ABŞ nümayəndələri ilə Ukraynadakı vəziyyətin nizamlanmasına dair danışıqların bərpa ediləcəyini gözlədiklərini deyib.
Onun sözlərinə görə, Kiyev real sülh nizamlanması yoluna çıxmaq üçün hansı addımları atmalı olduğunu bilir. Moskva Vaşinqtonun sülh səylərinin davam etdiriləcəyinə və Kiyevin də buna açıq olacağına ümid edir.
Peskov Kiyevin son dövrdə nümayiş etdirdiyi “çevikliyin” maliyyə çatışmazlığı ilə bağlı olduğunu bildirib. O qeyd edib ki, bu, sülh nizamlanması üçün tələb olunan çeviklik deyil.
Peskov həmçinin bir sıra ölkələrin Ukrayna üzrə danışıqların keçirilməsi üçün platforma təqdim etməyə maraq göstərdiyini deyib.
Kremlin sözçüsü mümkün “yol xəritəsi”nin məzmununun hazırda açıq şəkildə müzakirə edilməməli olduğunu bildirib. Onun sözlərinə görə, hələlik bu istiqamətdə tam formalaşmış planlar yoxdur.
17:47 09.09.2026
Oxunuş sayı: 44
