Tramp İran müharibəsinin ABŞ-nin imkanlarını zəiflətməsi ilə bağlı xəbərdarlığı rədd etdi
ABŞ prezidenti Donald Tramp İranla müharibənin Vaşinqtonun digər təhdidlərə, o cümlədən ölkə daxilindəki təhlükələrə qarşı mübarizə imkanlarını zəiflətməsi barədə xəbərdarlıqları rədd edib.
Crossmedia.az xəbər verir ki, Donald Tramp bu barədə jurnalistin sualını cavablandırarkən danışıb.
Məlumata görə, bir sıra ABŞ rəsmiləri müdafiə naziri Pit Heqsetə İran müharibəsinin ABŞ-nin həm ölkə daxilində, həm də dünyanın digər bölgələrində mümkün təhdidlərə qarşı mübarizə qabiliyyətini zəiflədə biləcəyini bildiriblər.
Tramp isə bu fikirlə razılaşmayıb. O bildirib ki, ABŞ-nin dünyanın müxtəlif bölgələrində böyük həcmdə sursat ehtiyatları var və zərurət yaranacağı təqdirdə həmin ehtiyatların bir hissəsi istifadə üçün yönləndirilə bilər.
“Dünyanın müxtəlif yerlərində o qədər çox sursatımız var ki, istəsək, onların bir hissəsini götürüb istifadə edə bilərik”, – Tramp deyib.
ABŞ prezidentinin sözləri Pentaqonun sursat ehtiyatları ilə bağlı son həftələrdə ortaya çıxan məlumatlar fonunda səslənib. ABŞ mediasında İran müharibəsinin xüsusilə bəzi uzaqmənzilli raket ehtiyatlarına ciddi təsir göstərdiyi barədə məlumatlar yayılıb. Tramp isə daha əvvəl də ABŞ-nin böyük sursat ehtiyatlarına malik olduğunu və yeni silahların istehsal edildiyini bildirib.
17:38 01.09.2026
Oxunuş sayı: 46
