Prezidentin Qırğızıstan səfəri və ŞƏT strategiyası: Bişkek sammiti Bakıya nə vəd edir?
Prezident İlham Əliyevin Şanxay Əməkdaşlıq Təşkilatının tədbirlərində iştirak etmək üçün Qırğızıstana işgüzar səfəri Azərbaycanın Avrasiya məkanında artan siyasi və strateji rolunu yenidən ön plana çıxarıb. Bişkekdə keçirilən tədbirlərdə 17 ölkənin liderinin, o cümlədən Türkiyə, Rusiya, Çin və İran kimi regional güclərin təmsil olunması sammitin əhəmiyyətini daha da artırır. Azərbaycanın nəqliyyat-logistika imkanlarının genişləndiyi və Orta Dəhlizin strateji rolunun gücləndiyi bir şəraitdə Prezidentin səfəri ölkənin ŞƏT məkanındakı əməkdaşlıq perspektivləri baxımından xüsusi diqqət çəkir.
Milli Məclisin Komitə sədri Fazil Mustafa Crossmedia.az-a açıqlamasında Şanxay Əməkdaşlıq Təşkilatı çərçivəsində keçirilən tədbirlərin Azərbaycan üçün siyasi, iqtisadi və diplomatik baxımdan mühüm əhəmiyyət daşıdığını bildirib:
“Bu cür tədbirlər yalnız Şanxay Əməkdaşlıq Təşkilatı çərçivəsində iqtisadi əməkdaşlığın inkişafı baxımından əhəmiyyət daşımır. Eyni zamanda, onlar ayrı-ayrı ölkələrlə ikitərəfli münasibətlərin inkişaf etdirilməsi üçün mühüm platforma rolunu oynayır. İran, Qırğızıstan, Çin və digər ölkələrlə bu platforma çərçivəsində ikitərəfli görüşlərin keçirilməsi xüsusi əhəmiyyət daşıyır. Azərbaycan Prezidenti də hər zaman olduğu kimi, bu imkanlardan səmərəli istifadə edərək ölkənin beynəlxalq əlaqələr sisteminin daha da genişlənməsinə töhfə verir”.
Deputatın sözlərinə görə, ŞƏT çərçivəsində keçirilən görüşlər və qəbul olunan qərarlar Azərbaycan üçün yeni əməkdaşlıq imkanları yaradır: “Bu platforma həm çoxtərəfli münasibətlərin inkişafına, həm də iştirakçı ölkələrlə ikitərəfli əlaqələrin genişləndirilməsinə imkan verir. Şanxay Əməkdaşlıq Təşkilatı çərçivəsində qəbul edilən qərarlar iqtisadi inteqrasiyanın güclənməsinə xidmət etməklə yanaşı, üzv və tərəfdaş ölkələrlə münasibətlərin daha da inkişaf etdirilməsi üçün yeni imkanlar yaradır. Bu baxımdan, belə tədbirlər Azərbaycan üçün olduqca əhəmiyyətlidir. Azərbaycanın bu platformada yüksək səviyyədə təmsil olunması da xüsusi önəm daşıyır. Çünki hazırkı mürəkkəb və qeyri-sabit beynəlxalq şəraitdə ölkələrin nə qədər geniş və sabit əlaqələr sisteminə malik olması, onların təhlükəsizliyi və milli maraqlarının təmin olunması baxımından bir o qədər vacibdir”.
F.Mustafa vurğulayıb ki, Azərbaycanın müxtəlif ölkələrlə siyasi, iqtisadi və diplomatik əlaqələrini genişləndirməsi ölkənin beynəlxalq mövqeyinin daha da möhkəmlənməsinə xidmət edir: “Azərbaycanın müxtəlif ölkələrlə siyasi, iqtisadi və diplomatik əlaqələrini genişləndirməsi ölkənin beynəlxalq mövqeyinin möhkəmlənməsinə və təhlükəsizliyinin daha etibarlı şəkildə təmin olunmasına xidmət edir”.
Nigar Xəlilli
17:00 01.09.2026
Oxunuş sayı: 54
