Nadir quş Çernobılda üzə çıxıb
Çernobıl Radiasiya-Ekoloji Biosfer Qoruğunda nadir görünən quşlardan biri – yastıquyruq cüllütü qeydə alınıb.
Crossmedia.az bu barədə ˝Unian˝a istinadən xəbər verir ki, qoruğun mütəxəssislərinin sözlərinə görə, bu quşu görməkdənsə, səsini eşitmək daha asandır.
Mütəxəssislər bildiriblər ki, yastıquyruq cüllütü ehtiyatlı davranışı ilə seçilir və vaxtının böyük hissəsini sıx kolluqlarda keçirir. Buna görə də onunla qarşılaşmaq olduqca nadir hadisə hesab olunur.
Quş əsasən meşə kənarlarında, kolluq ərazilərdə, meşə zolaqlarında və kolluqların açıq sahələrlə birləşdiyi mozaik landşaftlarda məskunlaşır. Bitki örtüyünün müxtəlif və sıx olduğu, kol və ağaclardan təbii dəhlizlərin yarandığı ərazilər onun üçün xüsusilə əlverişlidir.
Quşun əsas qidasını həşəratlar və onların sürfələri, həmçinin hörümçəklər və digər onurğasızlar təşkil edir. Tədqiqatçılar qeyd edirlər ki, valideynlər balalarını olduqca müxtəlif qidalarla bəsləyirlər. Balaların rasionunda böcəklər, hörümçəklər və digər buğumayaqlılarla yanaşı, yayın sonlarında giləmeyvə və yumşaq meyvələr də mühüm yer tutur.
Bu quşun nəğməsi müxtəlif fitlərdən və qısa, kəsik səslərdən ibarətdir. O, yalnız kolun başında oturarkən deyil, uçuş zamanı da oxuya bilir. Qısa və narahatlıq bildirən çek səsi isə quşun özünü görmək mümkün olmadıqda belə onun yaxınlıqda olduğunu müəyyən etməyə imkan verir.
Mütəxəssislərin sözlərinə görə, quş yuvasını adətən yerdən çox yüksəklikdə olmayan sıx kolluqlarda qurur. Yuva yaxınlığında olduqca ehtiyatlı davranır və insan müdaxiləsini həddindən artıq hiss etdikdə yumurtalarını tərk edə bilər.
Qeyd edək ki, bundan əvvəl də Çernobıl Radiasiya-Ekoloji Biosfer Qoruğunda gecə həyat tərzi keçirən, ağacların çətirlərində və sıx kolluqlarda yaşayan kiçik gəmirici – fındıq yuxulusu qeydə alınmışdı.
19:32 27.08.2026
Oxunuş sayı: 44
