İlk dəfə insan neyronları ilə işləyən bioloji məlumat mərkəzi yaradılıb
Sinqapur dünyada ilk dəfə olaraq canlı insan neyronlarının server sisteminə inteqrasiya edildiyi bioloji məlumat mərkəzinin prototipini təqdim edib. Yeni layihə daha səmərəli və adaptiv hesablama sistemlərinin yaradılması istiqamətində mühüm addım kimi qiymətləndirilir.
Crossmedia.az xəbər verir ki, bu barədə “The Straits Times” məlumat yayıb.
Layihə Sinqapur Milli Universitetinin Yonq Lu Lin Tibb Məktəbi, məlumat mərkəzi operatoru “DayOne” və bioloji hesablama şirkəti “Cortical Labs”ın əməkdaşlığı çərçivəsində hazırlanıb. Prototip 20 ədəd CL1 bioloji hesablama qurğusundan ibarətdir. Hər bir qurğuda laboratoriya şəraitində yetişdirilən insan neyronları silikon avadanlıqla birləşdirilib. Bildirilir ki, bir CL1 qurğusunda təxminən 800 min neyron istifadə olunur. Bu isə 20 qurğudan ibarət sistemdə ümumilikdə təxminən 16 milyon canlı insan neyronunun iştirak etdiyi anlamına gəlir. Yeni texnologiyanın gələcəkdə daha az enerji sərf edən, öyrənmə və dəyişən şəraitə uyğunlaşma qabiliyyətinə malik hesablama sistemlərinin inkişafına töhfə verəcəyi gözlənilir.
12:12 24.08.2026
Oxunuş sayı: 55
