Tramp husilərə qarşı əməliyyat üçün Səudiyyə Ərəbistanına dəstək verib
ABŞ Prezidenti Donald Tramp Səudiyyə Ərəbistanının vəliəhdi Məhəmməd bin Salmanın husilərə qarşı planlaşdırılan hərbi əməliyyatla bağlı dəstək istəyini qəbul edib.
Crossmedia.az xəbər verir ki, bu barədə "Axios" ABŞ rəsmilərinə istinadən məlumat yayıb.
Nəşrin məlumatına görə, Məhəmməd bin Salman əməliyyatdan əvvəl Donald Trampla telefon danışığı apararaq Vaşinqtonun siyasi və hərbi dəstəyini istəyib. ABŞ rəsmilərinin fikrincə, bu addım Ər-Riyadın husilərlə genişmiqyaslı qarşıdurma ehtimalından narahat olduğunu və ABŞ nin dəstəyinə ehtiyac duyduğunu göstərir.
Bildirilib ki, ötən həftə Səudiyyə Ərəbistanı Vaşinqtona mövcud vəziyyətlə bağlı narahatlığını çatdırıb. Daha sonra Səudiyyə Ərəbistanının ABŞ dəki səfiri dövlət katibi Marko Rubio ilə görüşüb, ardınca isə Rubio Səudiyyə Ərəbistanının xarici işlər naziri şahzadə Feysal bin Fərhanla telefon danışığı aparıb.
Məlumata əsasən, son gərginlik İranın "Mahan Air" aviaşirkətinə məxsus təyyarənin husilərin nəzarətində olan Səna şəhərinə enməsindən sonra başlayıb. ABŞ tərəfi həmin təyyarənin husilərə silah, raket hissələri və iranlı hərbi mütəxəssislər daşıdığını iddia edib.
Bundan sonra husilər Səudiyyə Ərəbistanının cənub-qərbində yerləşən Abha hava limanına ballistik raketlər və pilotsuz uçuş aparatları ilə zərbələr endirib. Həmçinin Səna hava limanına tətbiq olunan blokada aradan qaldırılana qədər aviaşirkətlərə Səudiyyə Ərəbistanının hava məkanından istifadə etməmək barədə xəbərdarlıq ediblər.
14:12 14.07.2026
Oxunuş sayı: 50
