Yeni Zelandiya və Hindistan strateji tərəfdaşlıq haqqında saziş imzalayıb
Yeni Zelandiya və Hindistan müdafiə, təhlükəsizlik, ticarət və texnologiya sahələrini əhatə edən strateji tərəfdaşlıq haqqında saziş elan ediblər.
Crossmedia.az xəbər verir ki, "AFP" bu barədə məlumat yayıb.
Razılaşma Hindistanın Baş naziri Narendra Modinin Vellinqtona səfəri zamanı əldə olunub. Bu, son 40 ildə Hindistan hökumət başçısının Yeni Zelandiyaya ilk rəsmi səfəridir.
Yeni Zelandiyanın Baş naziri Kristofer Lakson Narendra Modini Maori xalqının ənənəvi qarşılama mərasimi və hərbi fəxri qarovul ilə qəbul edib. Tərəflər bildiriblər ki, strateji tərəfdaşlıq iki ölkə arasında əlaqələrin möhkəmləndirilməsinə və Hind-Sakit okean regionunda əməkdaşlığın genişləndirilməsinə xidmət edəcək.
Saziş çərçivəsində birgə hərbi-dəniz təlimlərinin keçirilməsi, müdafiə sahəsində əməkdaşlığın dərinləşdirilməsi, həmçinin diplomatiya, ticarət, elm, mədəniyyət və idman sahələrində əlaqələrin inkişafı nəzərdə tutulur.
Narendra Modi demokratik dəyərlərə sadiqliyin Hindistan və Yeni Zelandiyanı təbii tərəfdaş etdiyini bildirib və strateji tərəfdaşlığın yaradılmasını iki ölkə münasibətlərində mühüm mərhələ adlandırıb.
Görüş zamanı liderlər Çinin Sakit okeanda ballistik raket sınağını da müzakirə ediblər. Kristofer Lakson Yeni Zelandiyanın xüsusilə təhlükəsizlik və ticarət sahələrində mümkün qədər çox tərəfdaşla əməkdaşlığı genişləndirmək niyyətində olduğunu vurğulayıb.
Məlumata görə, strateji tərəfdaşlıq sazişi bu ilin aprel ayında imzalanmış azad ticarət sazişinin davamı hesab olunur. Bununla yanaşı, həmin razılaşma Hindistan vətəndaşları üçün viza imkanlarının genişləndirilməsi ilə bağlı müddəalara görə Yeni Zelandiyada müəyyən siyasi müzakirələrə səbəb olub.
Narendra Modinin Yeni Zelandiya səfəri onun İndoneziya və Avstraliyanı da əhatə edən regional turnesi çərçivəsində baş tutub. Səfər Çinin Sakit okean regionunda diplomatik və hərbi fəallığını artırdığı bir dövrə təsadüf edib.
12:16 11.07.2026
Oxunuş sayı: 46
