KİV: Ermənistan Konstitusiya Məhkəməsi hakimlərinə təzyiq göstərilir
Ermənistanda Konstitusiya Məhkəməsinin 7 iyun seçkiləri ilə bağlı qərarının qəbuluna hakimlərə göstərilən təzyiqlərin təsir etdiyi iddia olunur.
Crossmedia.az xəbər verir ki, "Hraparak" qəzeti bu barədə məqalə yayıb.
Nəşrin iddiasına görə, hakimiyyət Konstitusiya Məhkəməsinin bəzi hakimlərinə müxtəlif vasitələrlə təsir göstərərək istədiyi nəticəni əldə edib. Məqalədə xüsusilə Konstitusiya Məhkəməsinin hakimi Artur Vaqarşyanın oğlu Areq Vaqarşyan barədə cinayət işinə diqqət çəkilir.
Bildirilir ki, Areq Vaqarşyan 2023-cü ildə keçmiş polis polkovniki Vardan Nadaryanın oğlu Eduard Nadaryana bıçaqla xəsarət yetirməkdə ittiham olunurdu. Onun barəsində həbs qətimkan tədbiri seçilməsi üçün məhkəməyə təqdimat verilsə də, vəsatət təmin edilməyib.
"Hraparak" yazır ki, təxminən üç ildir davam edən ibtidai istintaq hələ də başa çatmayıb. Nəşrin iddiasına əsasən, bu müddət ərzində Areq Vaqarşyan və digər təqsirləndirilən şəxslərə qarşı ittihamlar ləğv edilib və cinayət işi faktiki olaraq dayandırılıb.
Qəzet qeyd edir ki, məsələ ilə bağlı Ermənistanın İstintaq Komitəsinə müraciət etsə də, qurum yalnız yazılı sorğu göndərilməsini tövsiyə edib.
14:27 11.07.2026
Oxunuş sayı: 58
