Xarici xəbərlər

ABŞ İsrailin İranla yeni qarşıdurmaya qoşulmasını istəmir

ABŞ administrasiyası İsrailin İranla mümkün yeni hərbi qarşıdurmada iştirak etməsini məqsədəuyğun hesab etmir və münaqişənin nəzarətdən çıxacağından ehtiyatlanır.

Crossmedia.az xəbər verir ki, "CNN" bu barədə israilli iki mənbəyə istinadən məlumat yayıb.

Məlumata görə, ABŞ Prezidenti Donald Trampın administrasiyası İsrailin döyüş əməliyyatlarına cəlb olunmasının regiondakı vəziyyəti daha da gərginləşdirə biləcəyini düşünür.

Mənbələrdən birinin sözlərinə görə, İsrailin Baş naziri Benyamin Netanyahu ABŞ-nin İrana mümkün zərbələrinə qoşulmaq niyyətindədir. Lakin Vaşinqton hazırda İsrailin hərbi əməliyyatlarda iştirakının əleyhinədir. Ağ Ev bu məlumatı hələlik şərh etməyib.

Bununla yanaşı, İsrailin müdafiə naziri İsrael Kats daha əvvəl bildirib ki, zərurət yaranacağı təqdirdə İsrail Müdafiə Ordusu İrana qarşı hərbi əməliyyatları müstəqil şəkildə bərpa etməyə hazırdır.

"CNN"in həmsöhbətlərindən birinin iddiasına görə, İsraildə hesab edirlər ki, Donald Tramp genişmiqyaslı müharibənin yenidən başlanmasında maraqlı deyil və ən sərt addım kimi yalnız İran limanlarına qarşı dəniz blokadasının bərpasına razılıq verə bilər.

🖨 Çap et

11:11 11.07.2026

Oxunuş sayı: 49