Diaspor təşkilatı yerli sakinlər üçün mədəni tədbir təşkil edib
Niderlandın Haaqa şəhərində fəaliyyət göstərən Hollanda-Azərbaycan Türk Kültür Dərnəyi Haaqa Bələdiyyəsinin dəstəyi ilə Transvaal rayonunun sakinləri üçün mədəni-ictimai tədbir təşkil edib.
Crossmedia.az xəbər verir ki, məhəllə sakinlərinin, xüsusilə də uşaqların böyük maraq və həvəslə qatıldığı tədbirin əsas məqsədi müxtəlif mədəniyyətləri bir araya gətirmək, icma üzvləri arasında həmrəyliyi gücləndirmək, uşaqların yaradıcılıq və sosial bacarıqlarının inkişafına töhfə vermək olub.
Tədbirdə uşaqlar üçün zəngin əyləncə və inkişaf proqramı hazırlanıb. Onlar müxtəlif interaktiv və maarifləndirici oyunlarda iştirak edib, bilik və məntiq yarışlarında öz bacarıqlarını nümayiş etdiriblər. Rəsm çəkib, əl işləri hazırlayıb, fərqli mövzularda öz təxəyyüllərini və istedadlarını sərgiləyiblər. Bununla yanaşı, açıq havada müxtəlif idman yarışları, komanda oyunları, estafetlər və əyləncəli müsabiqələr təşkil olunub.
Tədbirdə valideynlər və məhəllə sakinləri də bir-biriləri ilə yaxından ünsiyyət qurmaq, yeni tanışlıqlar yaratmaq və icma mühitini daha da möhkəmləndirmək imkanı əldə ediblər. Böyük rəğbətlə qarşılanan tədbir uşaqların sevinc dolu təbəssümləri, ailələrin xoş təəssüratları və mehriban atmosferi ilə yadda qalıb.
Qeyd edək ki, Niderland-Azərbaycan Türk Kültür Dərnəyi 2009-cu ildən etibarən Haaqa bələdiyyəsi ilə birlikdə Niderland dili kurslarını təşkil edir. Məqsəd müxtəlif ölkələrdən Niderlanda köçən və yerli cəmiyyətə sıx inteqrasiya etmək istəyən gənclərə dəstək göstərməkdir.
22:10 09.07.2026
Oxunuş sayı: 27
