Azərbaycanla bağlı yeni iddia səsləndirildi: Ermənistanda narahatlıq
Ermənistanda keçirilən parlament seçkilərindən sonra yaranan siyasi vəziyyət ölkədə ciddi müzakirələrə səbəb olub.
Crossmedia.az Sputnik Armenia-ya istinadən xəbər verir ki, "Çiçəklənən Ermənistan" partiyasının namizədi Vahe Hovannisyanın sözlərinə görə, partiya ətrafında baş verən proseslər artıq təkcə siyasi qüvvənin maraqlarına deyil, parlamentin legitimliyinə də təsir göstərir.
Onun sözlərinə görə, "Çiçəklənən Ermənistan" partiyasının parlamentdə təmsil olunmaması qanunverici orqanın legitimliyi ilə bağlı suallar yarada bilər və xarici qüvvələr bundan Ermənistanın əleyhinə istifadə edə bilərlər.
Hovannisyan cəmiyyətin dərin şəkildə parçalandığını, hakimiyyətin isə müxalifətlə yalnız hüquq-mühafizə orqanları vasitəsilə münasibət qurduğunu iddia edib. O, müxalifətə səs vermiş yüz minlərlə vətəndaşın ictimai-siyasi həyatdan kənarda saxlanıldığını bildirib.
İqtisadi vəziyyətə toxunan siyasətçi Rusiya ilə münasibətlərdə yaranan gərginliyin Ermənistan iqtisadiyyatına mənfi təsir göstərə biləcəyini vurğulayıb. O, Avropa bazarlarına çıxışla bağlı bəyanatların isə real alternativdən çox siyasi PR xarakteri daşıdığını qeyd edib.
Azərbaycanla münasibətlər barədə danışan Hovannisyan Bakının İrəvana təzyiqləri artıracağını və bölgədə yeni gərginlik ocaqlarının yarana biləcəyini iddia edib.
15:00 13.06.2026
Oxunuş sayı: 65
