Aİ Ukrayna və Moldova ilə üzvlük danışıqlarının ilk mərhələsinə başlayır
Avropa Komissiyasının sədri Ursula fon der Lyayen bildirib ki, Avropa İttifaqına üzv olan bütün dövlətlər Ukrayna və Moldova ilə üzvlük danışıqlarının ilk blokunun açılması barədə razılığa gəliblər.
Crossmedia.az bu barədə xarici mediaya istinadən xəbər verir.
Onun sözlərinə görə, bazar ertəsi keçiriləcək ilk hökumətlərarası konfransda üzvlük prosesinin əsasını təşkil edən fundamental məsələlər üzrə danışıqlara start veriləcək. Bu mərhələ hüququn aliliyi, güclü demokratik institutlar və Avropa İttifaqının əsas dəyərlərini əhatə edəcək.
Fon der Lyayen qeyd edib ki, bu qərar Ukrayna və Moldovanın çətin şəraitə baxmayaraq islahatlar istiqamətində nümayiş etdirdiyi qətiyyətin, cəsarətin və əzmkarlığın tanınmasıdır.
Avropa Komissiyasının sədri vurğulayıb ki, genişlənmə Avropa İttifaqının strateji seçimidir və ölkələrin yaxınlaşması qitədə sülhün, təhlükəsizliyin və rifahın möhkəmlənməsinə xidmət edir.
O əlavə edib ki, artan qlobal qeyri-müəyyənlik şəraitində daha böyük Avropa İttifaqı bütün üzv və namizəd ölkələrin ümumi maraqlarına cavab verir. Fon der Lyayenin sözlərinə görə, genişlənmə Aİ-nin ən uğurlu layihələrindən biri olaraq qalır və ortaq gələcəyə ən yaxşı investisiyadır.
14:28 13.06.2026
Oxunuş sayı: 87
