İnternet fenomenindən Hollivuda: “The Backrooms” filmi rekord nəticə göstərib
Sosial şəbəkələrdə böyük maraq qazanan “The Backrooms” qorxu layihəsi ilk dəfə tammetrajlı film kimi təqdim olunub. Layihənin müəllifi, 20 yaşlı amerikalı məzmun yaradıcısı Keyn Parsons internetdə yaratdığı uğurlu seriyanı kino ekranlarına daşımağa nail olub.
Crossmedia.az xarici KİV-ə istinadən xəbər verir ki, filmin istehsalını məşhur A24 studiyası həyata keçirib. Məlumata görə, ekran əsəri Böyük Britaniya və İrlandiyada nümayişə başladıqdan sonra yüksək gəlir əldə edərək diqqətçəkən kassa göstəricilərinə imza atıb.
Filmin hazırlanması mürəkkəb və gərgin proseslə müşayiət olunub. Kanadanın Vankuver şəhərində fəaliyyət göstərən kiçik yaradıcı heyət layihəni vaxtında başa çatdırmaq üçün son günlərə qədər intensiv işləyib.
Mütəxəssislər hesab edirlər ki, “The Backrooms”un uğuru rəqəmsal platformalarda fəaliyyət göstərən yaradıcıların ənənəvi kino sənayesində də uğur qazana biləcəyini göstərir. Xüsusilə YouTube gənc rejissorlar və məzmun yaradıcıları üçün böyük maliyyə imkanları olmadan ideyalarını təqdim etmək, auditoriya toplamaq və gələcək layihələr üçün özlərini sübut etmək imkanı yaradır.
Layihənin müəllifi gənc yaradıcıların ilk növbədə alqoritmlərə deyil, yaradıcılığa diqqət yetirmələrinin vacibliyini vurğulayıb. Onun fikrincə, uğurun əsas şərtlərindən biri özünəməxsus mövzu seçmək və daha əvvəl mövcud olmayan fərqli məzmun ortaya qoymaqdır. O, həmçinin ailə dəstəyinin, xüsusilə texniki məsələlərdə göstərilən köməyin yaradıcılıq fəaliyyətində mühüm rol oynadığını qeyd edib.
Qeyd edək ki, “The Backrooms” boş, səssiz və narahatedici məkanların təsviri üzərində qurulan qorxu kainatıdır. Layihə tamaşaçılarda uşaqlıq xatirələrini, yuxuları və qəribə tanışlıq hissini oyatdığı üçün qısa müddətdə geniş auditoriya qazanıb. Məlumata görə, “The Backrooms” kainatının gələcəkdə yeni film və layihələrlə daha da genişləndirilməsi planlaşdırılır.
01:23 13.06.2026
Oxunuş sayı: 51
