Xarici xəbərlər
Avropa ukraynalı kişilər üçün fərqli qaydalar tətbiq etməyə hazırlaşır
Avropa İttifaqında hərbi yaşda olan Ukrayna vətəndaşları üçün müvəqqəti müdafiə rejiminin məhdudlaşdırılması imkanları müzakirə edilir.
Crossmedia.az xəbər verir ki, "Euractiv" nəşrinin Avropa rəsmilərinə istinadən yaydığı məlumata görə, məsələ ukraynalıların 2027-ci ildən sonra Aİ ölkələrində rezidentlik statusu üçün yeni sistemin hazırlanması çərçivəsində nəzərdən keçirilir.
Müzakirə olunan variantlar arasında qaçqınların böyük hissəsi üçün xüsusi müdafiə statusunun saxlanılması, lakin hərbi xidmətə cəlb oluna biləcək kişilər üçün ayrıca qaydaların tətbiqi də var.
Nəşr qeyd edir ki, təşəbbüs Ukraynada hərbi səfərbərlik və əsgər çatışmazlığı ilə bağlı problemlərin artması fonunda gündəmə gəlib. Bəzi Avropa siyasətçiləri hesab edir ki, hərbi yaşda olan kişilərin qadınlar, uşaqlar və digər qaçqın kateqoriyaları ilə eyni müdafiə rejimindən istifadə edib-etməməsi yenidən qiymətləndirilməlidir.
Bildirilir ki, Avropa Komissiyası yaxın aylarda ukraynalılar üçün gələcək hüquqi rejimlə bağlı təkliflərini təqdim edəcək. Bundan sonra məsələ Aİ-yə üzv dövlətlər arasında geniş müzakirəyə çıxarılacaq.
Bununla yanaşı, Avropa Komissiyasının hazırkı rəsmi mövqeyi dəyişməz qalır. Qurum hərbi yaşda olan kişilərin də digər Ukrayna vətəndaşları kimi müvəqqəti müdafiə hüququna malik olduğunu bildirir.
15:03 01.06.2026
Oxunuş sayı: 57
