Transxəzər marşrutu genişlənir: Rusiyanın tranzit üstünlüyü risk altında
Qazaxıstan və Çin Rusiyadan yan keçən Transxəzər marşrutunun inkişafını sürətləndirir.
Crossmedia.az xəbər verir ki, Avropaya yük daşımalarını təmin edən Transxəzər Beynəlxalq Nəqliyyat Marşrutu Xəzər dənizi, Azərbaycan, Gürcüstan və Türkiyə üzərindən uzanır. Marşrut logistika baxımından Rusiya ərazisindən keçən alternativlərə nisbətən daha mürəkkəb hesab edilsə də, sanksiya riskləri və Moskva asılılığını azaltmaq istəyi onun əhəmiyyətini artırır.
Məlumata görə, Qazaxıstan və Çin dəhlizin genişləndirilməsi istiqamətində əməkdaşlığı gücləndirir. Planlara əsasən, 2030-cu ilədək marşrutun yükdaşıma qabiliyyətinin iki dəfə artırılması nəzərdə tutulur.
Ukrayna kəşfiyyatının qiymətləndirməsinə görə, layihənin tam reallaşması Rusiyanın əsas tranzit qovşağı statusuna ciddi təsir göstərə və ölkənin bu sahədən əldə etdiyi milyardlarla dollarlıq gəlirləri azalda bilər.
Bununla yanaşı, Qazaxıstanın son dövrlərdə iri enerji layihələrində Rusiya podratçılarından daha az istifadə etməsi də diqqət çəkir. Müşahidəçilər bunu Rusiyanın postsovet məkanındakı təsir imkanlarının zəifləməsinin göstəricilərindən biri kimi qiymətləndirirlər.
Nigar Xəlilli
22:01 31.05.2026
Oxunuş sayı: 57
