Rusiya Starlink peyklərinə qarşı yeni silah hazırlayır
Rusiya İlon Maskın Starlink peyklərinə qarşı yeni silah hazırlayır.
Crossmedia.az bu barədə Associated Press-ə istinadən xəbər verir.
Agentlik bildirir ki, bu barədə iki NATO kəşfiyyat xidmətindən məlumat əldə edilib. Rusiya hazırladığı silahla döyüş meydanında Ukraynaya dəstək verən Qərbin kosmik üstünlüyünü məhdudlaşdırmağı hədəfləyir.
Qeyd olunur ki, silah yüz minlərlə kiçik, yüksək sıxlıqlı mərmilərin orbitə yerləşdirilməsini nəzərdə tutan “ərazi əsaslı” sistemdir və eyni vaxtda bir neçə Starlink peykini sıradan çıxara bilər. Analitiklər xəbərdarlıq edirlər ki, bu cür silahın istifadəsi kosmosda nəzarətsiz xaosa səbəb ola və təkcə Qərb ölkələrini deyil, həm də Rusiyanın özünü və müttəfiqlərini, xüsusən də Çini təhlükə altına qoya bilər. Bu amil Moskvanı sistemin istifadəsindən və yerləşdirilməsindən çəkindirə bilər.
Kəşfiyyat hesabatlarında Rusiyanın silahı nə vaxt yerləşdirə biləcəyi və ya sınaqdan keçirib-keçirmədiyi dəqiq göstərilmir. Lakin bir rəsmi bildirib ki, sistem hazırda aktiv inkişaf mərhələsindədir və tamamlanma tarixi hələ məxfi saxlanılır.
20:52 22.12.2025
Oxunuş sayı: 1256
