Qərb kəşfiyyat mənbələrinin məlumatına görə, son dövrlər İranın İslam İnqilab Keşikçiləri Korpusunun (SEPAH) Hava-Kosmik Qüvvələrində qeyri-adi və genişmiqyaslı hərbi fəallıq müşahidə olunur.
Crossmedia.az xəbər verir ki, KİV-in Qərb kəşfiyyatına istinadən yaydığı xəbərə görə, bu proses dron, ballistik raket və hava hücumundan müdafiə bölmələrinin koordinasiyalı fəaliyyəti, eləcə də komanda-idarəetmə sistemləri, qoşunların yerləşdirilməsi və logistika hərəkətləri ilə müşayiət olunur.
Məlumata əsasən, İran hazırda təxminən 4 min ballistik raket ehtiyatı formalaşdırıb. Onlardan 100 atəş qurğusu yenilənib, əlavə 60 qurğu isə modifikasiya edilib. Həmçinin ölkənin arsenalında 10 minə yaxın müxtəlif təyinatlı dronun olduğu bildirilir. Bununla yanaşı, mövcud bunkerlərdə rabitə sistemləri yenilənib və yeni bunker obyektlərinin inşasına start verilib.
Qərb kəşfiyyatı qeyd edir ki, İran nüvə alimlərinin təhlükəsizliyi üçün ikili qorunma mexanizmi yaradıb, bütün əsas dövlət məmurları üçün isə ən azı iki ehtiyat əvəzedici müəyyən edilib. Eyni zamanda, son 12 günlük müharibədə effektivliyi ilə seçilən “Xeybərşakan” qanadlı hipersonik raketi təkmilləşdirilib və hazırda bu tipdən təxminən 100 raketin ehtiyatda saxlanıldığı bildirilir.
Məlumatda vurğulanır ki, İran bir neçə ay əvvəl əldə etdiyi MiQ-29 qırıcılarının sayını 48-ə çatdırıb. Sözügedən qırıcıların əlavə ballistik raketlərlə təchiz edildiyi qeyd olunur. Bundan başqa, iranlı pilotların Rusiyada Su-35 qırıcılarının idarə olunması üçün təlimlərə başladığı bildirilir.
Kəşfiyyat məlumatlarına görə, Tehran yaxınlığında İran hərbi təyyarələrinə texniki xidmət göstərilməsi məqsədilə Rusiyanın “Rostex” şirkətinə məxsus yeni hərbi mərkəz yaradılıb. Müəssisənin İran və Rusiya mütəxəssisləri tərəfindən birgə istifadə ediləcəyi qeyd olunur.
Həmçinin İranın Rusiyadan S-400 hava hücumundan müdafiə sistemlərinin iki batareyasını və S-300 sisteminin modifikasiya edilmiş yeni versiyasını əldə etdiyi bildirilir. İranın mövcud HHM sistemlərinə isə “Almaz-Antey” şirkəti tərəfindən texniki xidmət göstərildiyi vurğulanır.
Bununla yanaşı, İran dövlət binaları ətrafında Rusiya və Çinin dəstəyi ilə vahid hava müdafiə şəbəkəsi yaratmağa çalışır. Qərb kəşfiyyatının məlumatına görə, Çin ilk dəfə olaraq Rusiyadan sonra İrana kosmik kəşfiyyat dəstəyi göstərib və İsrailin bəzi hərbi obyektləri ilə bağlı məlumatlar təqdim edib. Rusiya isə bu istiqamətdə kəşfiyyat dəstəyi verməkdən imtina edib.
