Ukrayna Rusiyanın enerji və hərbi obyektlərinə zərbələr endirib
Dekabrın 22-nə keçən gecə Ukraynanın Müdafiə Qüvvələri Rusiyanın hərbi və enerji infrastrukturu obyektlərinə, həmçinin müvəqqəti işğal olunmuş ərazilərə silsilə zərbələr endirib. Bu barədə Ukrayna Silahlı Qüvvələri məlumat yayıb.
Crossmedia.az xarici KİV-ə istinadən xəbər verir.
Məlumata görə, əməliyyatların əsas məqsədi Rusiya Federasiyasının hərbi-iqtisadi potensialının zəiflədilməsi olub. Zərbələr nəticəsində Krasnodar diyarında yerləşən “Tamannefteqaz” neft terminalı vurulub. Partlayışlar qeydə alınıb, boru kəməri, iki körpü və bir neçə gəmi zədələnib. Ərazidə sahəsi 1 min kvadratmetrdən artıq olan yanğın baş verib, yanğın rezervuar parkını da əhatə edib. Qeyd olunur ki, terminal neft, neft məhsulları və mayeləşdirilmiş karbohidrogen qazlarının aşırılması üçün istifadə olunur və Rusiyanın enerji arxa cəbhəsinin bir hissəsi hesab edilir.
Bundan əlavə, Ukrayna istehsalı raketlə müvəqqəti işğal olunmuş Krımın Olenyovka yaşayış məntəqəsində 92-ci çay katerləri briqadasının üzən vasitələrinin müvəqqəti bazasına zərbə endirilib.
Ukrayna Silahlı Qüvvələrinin məlumatına görə, Pokrovsk istiqamətində motoatıcı alaya məxsus sursat anbarı məhv edilib. Eyni zamanda, müvəqqəti işğal olunmuş Donetsk ərazisində Shahed/“Geran” tipli zərbə PUA-larının saxlanma və buraxılış məntəqələri vurulub.
Türkanə Məşədiyeva
18:28 22.12.2025
Oxunuş sayı: 973
