Xarici xəbərlər

Kreml İlham Əliyevin MDB sammitində iştirak edə bilməməsinə münasibət bildirib

Rusiya tərəfi Azərbaycan Prezidenti İlham Əliyevin Sankt-Peterburqda keçirilən MDB-yə üzv ölkələrin sammitində iştirak edə bilməməsini anlayışla qarşılayır.

Crossmedia.az xəbər verir ki, Rusiya Prezidenti Vladimir Putinin mətbuat katibi Dmitri Peskovun sözlərinə görə, dövlət başçılarının, xüsusilə də ilin son ayında,yəni Yeni il ərəfəsində iş qrafiki olduqca gərgin olur və bu cür hallar təbiidir. O, İlham Əliyevin sammitə qatıla bilməməsinin Kreml üçün gözlənilməz olmadığını vurğulayıb.

“Biz buna tam anlayışla yanaşırıq. Dövlət başçılarının iş qrafiki çox sıxdır, dekabr ayı isə xüsusilə gərgin dövrdür”, – deyə Peskov qeyd edib.

Rusiya Prezidentinin mətbuat katibi eyni zamanda bildirib ki, Azərbaycan liderinin sammitdə iştirak etməməsi Moskva ilə Bakı arasında münasibətlərə mənfi təsir göstərmir. Onun sözlərinə görə, Rusiya və Azərbaycan tərəfdaşlıq və əməkdaşlıq münasibətlərini əvvəlki qaydada inkişaf etdirməyə davam edir.

Qeyd edək ki, MDB sammiti üzv dövlətlər arasında siyasi, iqtisadi və humanitar əməkdaşlığın müzakirə olunduğu əsas platformalardan biri hesab olunur. Buna baxmayaraq, tərəflər yüksək səviyyəli dialoqun davam etdiyini və ikitərəfli əlaqələrin möhkəmləndirilməsinin gündəmdə qaldığını vurğulayırlar.

Nastya Qəniyeva

🖨 Çap et

14:33 22.12.2025

Oxunuş sayı: 1134