İsrail: İranın raket təlimləri real hücuma hazırlıq ola bilər
İsrail hərbi kəşfiyyat kanalları vasitəsilə ABŞ prezident administrasiyasını İranın İslam İnqilabı Keşikçiləri Korpusunun (SEPAH) keçirdiyi genişmiqyaslı raket təlimlərinin real hücuma hazırlıq üçün örtük ola biləcəyi barədə xəbərdar edib.
Bu barədə Crossmedia.az "Axios" nəşrinin İsrail və ABŞ mənbələrinə istinadən verdiyi məlumata əsasən xəbər verir.
Mənbələrin bildirdiyinə görə, dekabrın 20-də İsrail Müdafiə Qüvvələrinin Baş Qərargah rəisi, general-leytenant Eyal Zamir ABŞ Mərkəzi Komandanlığının rəhbəri, admiral Bred Kuper ilə telefon danışığı aparıb.
Dekabrın 21-də Tel-Əvivdə keçirilən görüşdə Zamir İran raketlərinin yer dəyişməsinin mümkün hücuma hazırlıq ola biləcəyini bildirib və müdafiə sahəsində koordinasiyanın gücləndirilməsinə çağırıb.
İsrailli mənbələrdən biri hücum ehtimalını 50 faizdən aşağı qiymətləndirsə də, 2023-cü ilin oktyabrında HƏMAS-ın hücumundan sonra Yerusəlimdə riskə dözümlülük səviyyəsinin xeyli azaldıldığı vurğulanır.
"Axios"un məlumatına görə, ABŞ kəşfiyyatı hazırda İran tərəfindən qaçılmaz hücum əlamətləri görmür.
Mehriban İbrahimli
12:20 22.12.2025
Oxunuş sayı: 964
