Avropa Ukrayna üçün təhlükəsizlik zəmanətləri planını təqdim edib
Avropa ölkələri Ukraynanın təhlükəsizliyinin təmin olunması məqsədilə yeni plan irəli sürüblər. Plan 6 əsas maddədən ibarətdir.
Bu barədə Crossmedia.az xarici mediaya istinadən xəbər verir.
Daimi hərbi dəstək:
Sənədə əsasən, Ukrayna Silahlı Qüvvələri sülh dövründə də 800 min nəfərə qədər şəxsi heyəti qoruyub saxlamalıdır. Bu, mümkün aqressiyanın qarşısının alınması və ölkə ərazisinin müdafiəsi məqsədi daşıyır.
Avropanın rəhbərliyi altında “Ukrayna üçün çoxmillətli qüvvə”:
“İstəkli ölkələr koalisiyası” çərçivəsində formalaşdırılacaq bu qüvvə ABŞ-ın dəstəyi ilə fəaliyyət göstərəcək. Qüvvənin əsas vəzifələri Ukrayna ordusunun bərpası, hava məkanının və dəniz təhlükəsizliyinin qorunması olacaq. Zərurət yaranarsa, Ukrayna ərazisində fəaliyyət də istisna edilmir.
Atəşkəsə nəzarət mexanizmi:
ABŞ-ın rəhbərliyi ilə beynəlxalq monitorinq mexanizmi yaradılacaq. Məqsəd mümkün hücumların vaxtında aşkarlanması, pozuntuların qeydə alınması və operativ reaksiya verilməsidir.
Hüquqi baxımdan məcburi təhlükəsizlik zəmanətləri:
Ukraynaya qarşı yeni hücum baş verərsə, tərəfdaş ölkələr hərbi, kəşfiyyat, iqtisadi və diplomatik vasitələrlə cavab verməyi öhdələrinə götürürlər.
Ukraynanın bərpasına investisiyalar:
Plan çərçivəsində ölkənin yenidən qurulması üçün maliyyə vəsaiti ayrılması, ticarət sazişlərinin bağlanması və dəymiş zərərin Rusiya tərəfindən kompensasiya olunması nəzərdə tutulur. Rusiya aktivləri Avropa İttifaqında dondurulmuş vəziyyətdə saxlanılacaq.
Ukraynanın Aİ-yə üzvlüyünə dəstək:
Sənəddə Ukraynanın Avropa İttifaqına üzvlük prosesinə siyasi dəstəyin davam etdiriləcəyi də qeyd olunur.
Mehriban İbrahimli
15:01 16.12.2025
Oxunuş sayı: 1196
