Ağ Ev Netanyahunu atəşkəs razılaşmasının pozulması ilə bağlı sərt şəkildə xəbərdar edib
ABŞ Prezidenti Administrasiyası, İsrailin baş naziri Benyamin Netanyahuya atəşkəs razılaşmasının şərtlərinin pozulması ilə əlaqədar “sərt şəxsi mesaj” göndərib.
Crossmedia.az xəbər verir ki,narazılığa səbəb HƏMAS-ın hərbi qanadının komandan müavini və 7 oktyabr hücumlarının ehtimal olunan təşkilatçılarından biri hesab edilən Rəəd Saadın zərərsizləşdirilməsi olub. Zərbə həftəsonu endirilib və ABŞ rəsmilərinin bildirdiyinə görə, İsrail əməliyyat öncəsi Vaşinqtonu nə məlumatlandırıb, nə də onunla məsləhətləşib.
Mənbələrin sözlərinə görə, Ağ Evin Netanyahuya ünvanladığı mesajda bildirilib ki, İsrailin bu cür addımları həm razılaşmalara sadiqliyə, həm də ABŞ Prezidenti Donald Trampın Qəzza üzrə vasitəçilik səylərinə xələl gətirir. Ağ Ev İsrail tərəfinin atdığı addımların Tramp administrasiyasının reputasiyasına zərər vurmasına imkan verilməyəcəyini vurğulayıb.
İki yüksək vəzifəli ABŞ rəsmisi bildirib ki, dövlət katibi Marko Rubio, xüsusi elçilər Stiv Uitkoff və Cared Kuşner Netanyahunun mövqeyindən ciddi narazıdırlar.
İsrail hökuməti isə ABŞ tərəfinə açıqlamasında HƏMAS-ın razılaşmanı pozduğunu, israilli hərbçilərə hücum etdiyini və silah qaçaqmalçılığını bərpa etdiyini iddia edib. İsrailli rəsmi Rəəd Saadın zərərsizləşdirilməsinin atəşkəsin davamını təmin etmək məqsədi daşıdığını bildirib.
Bununla yanaşı, Tramp administrasiyası İsrailin Suriyanın bəzi bölgələrinə endirdiyi zərbələrin həmin ölkədə sabitliyin bərpasına yönəlmiş səyləri zəiflədiyini və İsrail–Suriya arasında mümkün təhlükəsizlik razılaşmasını çətinləşdirdiyini düşünür.
Ağ Ev, həmçinin israilli məskunlaşanların fələstinlilərə qarşı zorakılığından narahatlığını ifadə edib və İsrailin bir sıra addımlarını təxribat xarakterli kimi dəyərləndirib. ABŞ rəsmilərinin fikrincə, Netanyahunun siyasəti İbrahim razılaşmalarının genişləndirilməsi, xüsusilə də Səudiyyə Ərəbistanı ilə aparılan danışıqlar fonunda əlavə çətinliklər yaradır.
ABŞ tərəfi vurğulayıb ki, Vaşinqton İsraildən təhlükəsizlik məsələlərində güzəşt istəmir, lakin ərəb dünyasında təxribat kimi qəbul edilən addımlardan çəkinilməsini gözləyir. Ağ Ev, eyni zamanda, Netanyahunun sülh razılaşmasının ikinci mərhələsinə — İsrail qoşunlarının daha dərin şəkildə geri çəkilməsini nəzərdə tutan mərhələyə keçid məsələsində kifayət qədər uzaqgörən davranmadığını hesab edir.
Nastya Qəniyeva
20:12 15.12.2025
Oxunuş sayı: 981
