Çin mediası: Rusiyanın Uzaq Şərqi strateji risk zonasına çevrilib
Çin mediasında Rusiyanın mümkün parçalanması fonunda Uzaq Şərq regionu ilə bağlı geniş təhlil dərc olunub.
Crossmedia.az-ın Çin mediasına istinadən verdiyi məlumata görə, məqalədə qeyd edilir ki, əgər Rusiya Federasiyasında mərkəzi hakimiyyət zəifləyərsə, 7 milyon kvadrat kilometrlik Uzaq Şərq ərazisi strateji baxımdan risk zonasına çevrilə bilər.
Yazıda xatırladılır ki, Pekin müqaviləsi nəticəsində Vladivostok, Saxalin adası və Ussuri çayının şərqində yerləşən 400 min kvadrat kilometr ərazi Rusiyaya verilib və bu proses Çin üçün bir milyon kvadrat kilometrdən artıq ərazi itkisi ilə nəticələnib. Bu da Çinin şimal-şərq sərhədlərinin müdafiəsini zəiflədib.
Məqalədə vurğulanır ki, hazırda Rusiya iqtisadiyyatı durğunluq yaşayır, ÜDM həcmi bir Çin əyalətinin iqtisadi göstəricilərindən geri qalır, inflyasiya isə sürətlə artır. 2022-ci ildə Ukraynada başlayan müharibə səbəbindən əsas Rusiya qoşunları qərb istiqamətinə yönəldilib və Uzaq Şərqdə 50 mindən az hərbçi qalıb.
Çin mediası regionun qızıl, almaz, neft və digər təbii ehtiyatlarla zəngin olduğunu, eyni zamanda Rusiyanın milli gəlirində mühüm paya sahib olduğunu qeyd edir. Lakin Moskvanın maliyyə imkanlarının müharibə səbəbilə zəiflədiyi bildirilir.
Məqalədə Çinin enerji ehtiyaclarına da toxunulur. Bildirilir ki, “Sibirin Gücü” qaz kəməri vasitəsilə illik 38 milyard kubmetr qaz tədarükü Çinin tələbatının cəmi 10 faizini qarşılayır.
Təhlildə vurğulanır ki, Rusiyada siyasi xaos yaranacağı təqdirdə, Uzaq Şərqdə qeyri-sabitlik riski arta bilər və ABŞ, Yaponiya kimi xarici güclər prosesi yaxından izləyəcək. Qeyd olunur ki, Çin artıq uzun müddətdir regionda iqtisadi fəaliyyət göstərir, yollar və limanlar tikir, mədənçilik və kənd təsərrüfatına investisiya yatırır. Yuanın dövriyyəsi artmaqda davam edir və WeChat regionda geniş istifadə olunur.
Məqalə müəllifləri Uzaq Şərqin hərbi yolla ələ keçirilməsinin məqsədəuyğun olmadığını, bunun qlobal sanksiyalarla nəticələnə biləcəyini bildirirlər. Çin üçün daha məqbul yolun iqtisadi təsirin artırılması, uzunmüddətli müqavilələrin bağlanması və bölgədə Çin tərəfdarı qüvvələrin dəstəklənməsi olduğu qeyd edilir.
Yekunda vurğulanır ki, Çinin Uzaq Şərqlə bağlı strategiyası uzunmüddətlidir və əsas məqsəd iqtisadi nüfuzun gücləndirilməsi yolu ilə regionda real təsir imkanlarının qorunmasıdır.
18:40 15.12.2025
Oxunuş sayı: 913
