Ermənistanda qəza: MN-in 24 yaşlı hərbçisi ölüb
Ermənistanda yol-nəqliyyat hadisəsi ölümlə nəticələnib. Hadisə bu gün Göyçə vilayətində baş verib.
Crossmedia.az-ın Ermənistan mediasına istinadən verdiyi məlumata görə, saat 08:30 radələrində İrəvan sakini, 24 yaşlı Qaqik S. idarə etdiyi “Mazda” markalı avtomobillə İrəvan–Göyçə–İcevan avtomobil yolunun 72-ci kilometrində hərəkət edərkən idarəetməni itirib. Nəticədə avtomobil yol kənarından çıxaraq bir neçə şam ağacına çırpılıb və sahəyə düşüb.
Qəza nəticəsində sürücü hadisə yerində həyatını itirib. Onun cəsədinin avtomobildən çıxarılması üçün Ermənistan Daxili İşlər Nazirliyinin Xilasedici Xidmətinin Göyçə yanğın-xilasedici dəstəsindən bir döyüş briqadası hadisə yerinə cəlb olunub.
Araşdırmalar zamanı müəyyən edilib ki, həlak olan şəxs Ermənistan Müdafiə Nazirliyinin 24 yaşlı hərbi qulluqçusudur. Bundan sonra faktla bağlı məlumat Ermənistan İstintaq Komitəsinin Hərbi İstintaq Baş İdarəsinin qarnizon istintaq bölməsinə ötürülüb. Hadisə yerinə istintaq qrupu və Ermənistan MN-in Hərbi Polisinin Göyçə xidmətinin əməkdaşları da gəliblər.
İstintaqçının tapşırığı ilə qəzaya uğramış avtomobil xüsusi mühafizə olunan əraziyə aparılıb. Hadisə ilə bağlı araşdırma aparılır.
15:05 15.12.2025
Oxunuş sayı: 1131
