Paşinyan: Erməni Apostol Kilsəsi siyasi alətə çevrilib
Ermənistanın Baş naziri Nikol Paşinyan Hamburqda erməni icmasının nümayəndələri ilə görüşü zamanı Erməni Apostol Kilsəsinin fəaliyyətini tənqid edib.
Crossmedia.az xarici mətbuata istinadən xəbər verir ki, Paşinyan bildirib ki, Ermənistandakı bir çox kilsələrdə artıq moizə oxunmur. Onun sözlərinə görə, Müqəddəs Liturgiyanın qaydasına əsasən, keşiş mərasimin müəyyən hissəsində moizə ilə çıxış etməlidir, lakin hazırda din xadimlərinə siyasi məzmunlu mətnlər göndərilir və onların oxunması tələb olunur. Baş nazir bunu yolverilməz adlandıraraq qeyd edib ki, kilsə faktiki olaraq siyasi partiyaya çevrilib.
Paşinyan həmçinin Erməni Apostol Kilsəsinin yüksək rütbəli ruhani şəxslərindən biri olan Ktriç Nersisyanın hava limanında qarşılanması ilə bağlı baş verən hadisəyə toxunub. O deyib ki, həmin gün baş verənlərdən sonradan xəbər tutub və videoyazılara baxıb. Videoda insanları Nersisyanı qarşılamaq üçün hava limanına çağırdıqlarını, lakin kifayət qədər insanın gəlmədiyini bildirib.
Baş nazirin sözlərinə görə, bu vəziyyət ruhani rəhbərliklə cəmiyyət arasında yaranan məsafəni göstərir və kilsənin xalqdan uzaqlaşmasının nəticəsidir.
Pərvin Hacıyeva
14:30 15.12.2025
Oxunuş sayı: 911
