Ermənistanda “Arsnakar” kompleksi dövlətin nəzarətinə keçiriləcək
Ermənistanda qanunsuz əmlak məsələləri diqqət mərkəzindədir. Ölkədə bir sıra tanınmış şəxslərin torpaq və obyektlərinin qaydasız əldə edilməsi aşkarlanıb. İndi dövlət həmin əmlakların müsadirəsi prosesini sürətləndirir
Ermənistanın keçmiş Futbol Federasiyasının rəhbəri Ruben Ayrapetyana məxsus “Arsnakar” restoran-otel kompleksi Göyçə gölünün sahilində dövlətə veriləcək.
Crossmedia.az erməni KİV-nə istinadən xəbər verir ki, Ermənistan baş prokuroru Anna Vardapetyan bu barədə milli park zonasında qanunsuz əmlakın müsadirəsi ilə bağlı prokurorluğun iddialarını təqdim edərkən hökumət iclasında bildirib.
Vardapetyan qeyd edib ki, kompleksin tikintisi üçün torpaq sahəsi qanunla tələb olunan tender keçirilmədən verilib – torpaq sahəsinin verilməsi ilə bağlı sənədlərdə tender protokolu yoxdur. Bundan əlavə, kompleksin sahibi dövlətə təxminən 35 milyon dram ($90 min) kirayə haqqı borcludur ki, bu da torpaq sahəsinin kadastr qiymətinin yenidən qiymətləndirilməsindən sonra artıb.
Oxşar pozuntular Ayrapetyana məxsus şəxsi evlərdə, eləcə də polis rəisi olmuş Vladimir Gasparyan və keçmiş deputat, terror təşkilatı “Erkra”nın rəhbəri Sasun Mikaelyana aid əmlaklarda da aşkarlanıb. Baş prokuror bildirib ki, bu əmlaklar əsasən həmin şəxslərin qohumlarının və ya onlarla əlaqəli müəssisələrin adına qeydiyyatdan keçib
Zeynəb Xuduyeva
13:21 11.12.2025
Oxunuş sayı: 975
