Xarici xəbərlər

Rusiya səfirliyi: Tailand–Kamboca sərhədində ruslar arasında itki yoxdur

Rusiyanın Banqkokdakı səfirliyi Tailand və Kamboca arasında gərginləşən münaqişə fonunda Rusiya vətəndaşları arasında xəsarət alanlar barədə məlumatın olmadığını açıqlayıb.

Crossmedia.az xəbər verir ki, bu barədə diplomatik missiyanın rəsmi Telegram kanalında bildirilib.

Səfirlik rusiyalılara sərhədyanı bölgələrə, xüsusilə “qaynar nöqtələr” kimi tanınan ərazilərə səfər etməkdən çəkinməyi tövsiyə edib.

Məlumata görə, Kambocanın Tailandla sərhədində artan toqquşmalar nəticəsində azı dörd mülki şəxs həlak olub, təxminən on nəfər yaralanıb. Döyüşlərin Oddar Myeonqçey və Preah Vihear əyalətlərində yaşayan sakinlərə təsir etdiyi bildirilir.

Tailand ötən həftə Kambocanı Buriram əyalətində mülki obyektləri atəşə tutmaqda ittiham etmişdi. Hər iki ölkə sərhəd zonasında bir-birinə zərbələr endirib, vəziyyət isə gərgin olaraq qalır.

Nəzrin Abbas

🖨 Çap et

14:57 08.12.2025

Oxunuş sayı: 990