Qahirədə Dostluq Cəmiyyətində Zəfər Günü və Dövlət Bayrağı Günü münasibətilə tədbir keçirilib
Misir-Azərbaycan Dostluq Cəmiyyətində 8 Noyabr - Zəfər Günü və 9 Noyabr - Dövlət Bayrağı Günü münasibətilə tədbir keçirilib. Tədbirdə Azərbaycanın Misirdəki səfiri Elxan Poluxov, səfirliyin digər əməkdaşları, Azərbaycan icmasının təmsilçiləri, o cümlədən yerli ictimaiyyətin nümayəndələri iştirak ediblər. Mərasimin açılışında Azərbaycanın və Misirin Dövlət himnləri səsləndirilib və ölkəmizin ərazi bütövlüyü uğrunda şəhid olanların xatirəsi bir dəqiqəlik sükutla yad olunub.
Misirdə Azərbaycan diasporunun sədri, Misir-Azərbaycan Dostluq Cəmiyyətinin İdarə Heyətinin sədri, Qahirə Universitetində Azərbaycan dili müəllimi tədqiqatçı-alim Seymur Nəsirov Zəfər Gününün xalqımızın tarixinə qızıl hərflərlə yazıldığını, hamımız üçün qürurverici gün olduğunu bildirib. S.Nəsirov xalqımızın tarixi boyu qəhrəman övladları ilə fəxr etdiyini qeyd edib. Əlavə edib ki, islam tarixində mühüm rol oynamış Nurəddin Zəngi, Səlahəddin Əyyubi kimi Azərbaycan əsilli sərkərdələr haqqında ərəbdilli mənbələrdə geniş məlumatlar vardır. Vurğulanıb ki, Ali Baş Komandan Prezident İlham Əliyevin rəhbərliyi ilə şanlı Azərbaycan Ordusunun 44 günlük müharibədə əldə etdiyi Zəfər də tarix kitablarına yazılıb və gələcək nəsillər üçün fəxr mənbəyidir.
S.Nəsirov, həmçinin Dostluq Cəmiyyətinin fəaliyyəti, eləcə də iki ölkə arasında tarixi, mədəni, elmi əlaqələr barədə məlumat verib. Qeyd olunub ki, cəmiyyətdəki kurslarda misirlilərlə yanaşı, müxtəlif ölkələrdən 650-dən çox tələbə ödənişsiz əsaslarla təhsil alırlar.
Daha sonra Azərbaycanın Misirdəki səfiri Elxan Poluxov çıxış edib. Səfir Misir və Azərbaycan xalqlarının işğala qarşı mübarizə tarixində oxşar cəhətlərin olduğunu qeyd edib. Zəfər Gününün tarixinə toxunan diplomat 44 günlük müharibənin xalqımızın Vətən sevgisinin göstəricisi olduğunu bildirib. “Bütün azərbaycanlılar 44 gün ərzində bir hədəf ətrafında birləşdilər. Bu vaxt ərzində dünyanın bir çox xalqları, dövlətləri Azərbaycan xalqının suverenliyinin bərpası və torpaqlarının azadlığı uğrunda mübarizəsini dəstəklədilər. Misirdən və digər yerlərdən dəstək səsləri gəldi”, - deyə səfir vurğulayıb.
Diplomat bildirib ki, 2020-ci ilin 8 noyabrı xalqımız üçün müqəddəs günlərdəndir. Bu zaman Azərbaycan ordusu Şuşa şəhəri üzərində bayrağımızı yenidən ucaltdı. 2023-cü ilin sentyabrında Azərbaycan münaqişəni tarixin arxivinə göndərdi və dövlət suverenliyini tam bərpa etdi.
Səfir E.Poluxov 44 günlük müharibə dövründə ölkəmizin üzləşdiyi çətinliklərdən də danışıb. Azərbaycana olan bütün təzyiqlərə baxmayaraq, Prezident İlham Əliyevin möhkəm inamı və iradəsi sayəsində xalqımız qələbə çalıb. “Biz xoşbəxt xalqıq ki, bu münaqişəni vaxtında arxivə qoyduq. Lakin arxivə qoyulan hadisələr yaddan çıxmır. Xoşbəxt xalqıq ki, yeni nəslimiz bu dövrü, hadisəni yalnız arxivlərdən və yazılacaq kitablardan öyrənəcək. Biz bu hadisələri tarix kimi yaşadacağıq və növbəti nəsillərə çatdıracağıq. Azərbaycan heç vaxt revanşizmə imkan verməyəcək. Bugünkü parad bir daha sübut etdi ki, hərbi imkanlarımız günü-gündən artır”, - deyə diplomat diqqətə çatdırıb.
Tədbirdə AMEA-nın akademik Ziya Bünyadov adına Şərqşünaslıq İnstitutunun Din və ictimai fikir şöbəsinin müdiri, institutun Gənc alim və mütəxəssislər şurasının sədri fəlsəfə üzrə fəlsəfə doktoru Elnur Mustafayev çıxış edərək Zəfər Günü haqqında danışıb. “Zəfər Günü Azərbaycan tarixinə qızıl hərflərlə yazılıb. İki əsrdir ki, biz torpaqlarımızı itirə-itirə gəlmişik, ədalətsizliyə məruz qalmışıq. Beş il bundan qabaq müzəffər ordumuz tarixi nailiyyətə imza atdı, ədaləti bərpa etdi. Bu təkcə Azərbaycan xalqının uğuru deyil, həmçinin islam və türk dünyasının uğurudur. 44 günlük müharibədən sonra biz alnıaçıq şəkildə danışırıq”, - deyə alim vurğulayıb. Daha sonra o, elmi ezamiyyətinin hədəfləri barədə danışıb. Qeyd edib ki, azərbaycanlı alimlərin ərsəyə gətirdiyi böyük irsi müəyyənləşdirmək üçün Misirdə tədqiqatlar aparır və qısa müddət ərzində əlyazmalar arasında 102-dən çox azərbaycanlı alimin əlyazmasını aşkarlayıb. Əlavə edib ki, bu tapıntılar onu göstərir ki, Azərbaycanın mədəni sərhədləri böyük coğrafi ərazini əhatə edir.
E.Mustafayev Misirin paytaxtı Qahirədə yerləşən “Misir Kitablar Evi”ndə (Dərul-Kutubil- Mısriyyə) Şah İsmayıl Səfəvinin şeir divanının aşkarlandığını bildirib. Xəttatı ustad Əli Məşhədi olan nüsxənin Şah İsmayılın vaxtında yazıldığı ehtimal olunur.
Tədbirin rəsmi hissəsinin sonunda cəmiyyətin tələbələri tərəfindən Azərbaycan haqqında şeirlər səsləndirilib.
Daha sonra tədbir iştirakçılarına milli mətbəximizin ənənəvi təamları təqdim edilib.
02:12 09.11.2025
Oxunuş sayı: 1115
