Pedaqoji Universitetdə ədəbi-bədii tədbir: Qalib xalqın dastanı
Noyabrın 6-da Azərbaycan Dövlət Pedaqoji Universitetində (ADPU) Tələbə Həmkarlar İttifaqı Komitəsinin (THİK) təşkilatçılığı ilə Zəfər Gününə həsr olunmuş “Qalib xalqın dastanı” adlı ədəbi-bədii tədbir keçirilib.
Universitetdən Crosssmedia.az-a bildirilib ki, tədbirdən əvvəl ADPU-nun rəhbərliyi və 44 günlük Vətən müharibəsində iştirak etmiş müəllimləri universitetin foyesində şəhidlərin xatirəsini əbədiləşdirmək məqsədilə yaradılmış “Zəfər guşə”sini ziyarət edərək şəhidlərin əziz xatirəsini ehtiramla anıblar. Ardınca ADPU-nun Heydər Əliyev muzeyi ziyarət olunub.
Tədbir universitetin rektoru professor Cəfər Cəfərovun giriş nitqi ilə başlanıb. Rektor çıxışında qeyd edib ki, 2020-ci ilin payızında xalqımız tarixinin ən mühüm qələbələrindən birini qazanıb. Ermənistanın təxribatlarına cavab olaraq Müzəffər Ali Baş Komandan İlham Əliyevin rəhbərliyi ilə Azərbaycan Ordusu 44 gün davam edən Vətən müharibəsində torpaqlarımızı işğaldan azad edib və ölkəmizin ərazi bütövlüyü təmin olunub.
2023-cü ilin sentyabrında həyata keçirilmiş lokal antiterror tədbirləri nəticəsində Azərbaycanın suverenliyinin tam bərpa olunduğunu və Konstitusiya quruluşunun bütün Qarabağ ərazisində bərpa edildiyini bildirən rektor Zəfərdən sonrakı illərdə həyata keçirilən genişmiqyaslı bərpa, yenidənqurma və reinteqrasiya proseslərindən söz açıb. Həmçinin qeyd edilib ki, Azərbaycan bu gün regionda sülhün, sabitliyin və inkişafın təşəbbüskarı kimi çıxış edir. Zəngəzur dəhlizinin, yeni nəqliyyat və enerji xətlərinin, beynəlxalq əməkdaşlıq layihələrinin icrası istiqamətində aparılan işlər ölkəmizin geosiyasi mövqeyini daha da möhkəmləndirir. Prezidentin rəhbərliyi ilə həyata keçirilən siyasət Azərbaycanı Cənubi Qafqazda əsas güc mərkəzinə çevirib. C.Cəfərov diqqətə çatdırıb ki, Azərbaycan Dövlət Pedaqoji Universitetinin 200-ə yaxın tələbə və məzunu da Vətən müharibəsində iştirak edib, onlardan 18 nəfəri şəhidlik zirvəsinə ucalaraq adını tariximizə qızıl hərflərlə yazdırıb. Bildirilib ki, şəhidlərin əziz xatirəsini əbədiləşdirilməsi, ailələrinə qayğı göstərilməsi, eyni zamanda, müharibə iştirakçısı olan tələbələrin daim diqqət mərkəzində saxlanılması, sosial layihələrə cəlb edilməsi prosesi universitetin əsas vəzifələrindəndir və ADPU-nun bu istiqamətdə fəaliyyətləri uğurla davam edir.
Tədbirin bədii hissəsində tələbələr tərəfindən vətənpərvərlik mövzusunda hazırlanmış bədii proqram təqdim edilib.
23:20 06.11.2025
Oxunuş sayı: 1139
