Dövlətçilik və suverenliyimizin səssiz düşməni
Hamımız çox yaxşı bilirik ki, Ramiz Mehdiyev dövlətə təkbaşına xəyanət etməyib.
Crossmedia.az xəbər verir ki, bu, bir nəfərin deyil, bir zehniyyətin uzun müddətdən bəri varlğını sürdürən xəyanətidir.
O zehniyyət ki, hər dəfə çətinlik qarşısında ümidini millətinə yox, Moskvaya bağlayıb.
O zehniyyət ki, xalqın iradəsini kiçildib, yad paytaxtların kölgəsində yaşamağı “siyasət” hesab edib.
Bu əzik düşüncə tərzi təkcə siyasi dairələrdə deyil, iqtisadi və “ziyalı” çevrələrdə də illərlə kök salıb.
Bəziləri kreslosunu, digərləri sərvətini, bir qismi isə ad-sanını qorumaq üçün dövlətin ruhunu satmaqdan çəkinməyib.
Beləcə, dövlətçiliyin mənəvi dayaqları olan azad düşüncə, milli iradə, istiqlal eşqi içəridən zədələnib.
Amma bu millət saysız-hesabsız ağrılı məqamların girdabından çıxıb.
Əsrlərlə sınaqlardan keçib və hər dəfə də diz çökənləri deyil, mübarizləri yaşadıb.
Çünki bu millətin yaddaşında bir həqiqət var:
Azadlıq heç vaxt verilmir, qazanılır.
Yaxın tariximizdən də göründüyü kimi, mübarizəmizin böyük bir qismi ruslar və onların əlaltılarıyla bağlıdır. Əgər bu gün ölkəmizin gələcəyinə və müstəqilliyinə əl uzadanları – “1937-ni yenidən yaşatmaq istəyənləri”, onların siyasi, iqtisadi və hətta dırnaq arası ziyalı təbəqəsini cəzalandırmasaq, xalqımız üçün böyük bir fəlakətə zəmin hazırlamış olarıq.
44 günlük Zəfərdən sonra Azərbaycan üçün ən böyük fürsət məhz bu zəhərli zehniyyətdən qurtulmaq, milli ruhun, dövlətə güvənin güclənməsi fürsətidir.
Çünki artıq məsələ təkcə bir şəxsin xəyanəti deyil, bir düşüncə tərzinin, zehniyyətin qollarını kəsmə, onları bərtərəf etmə məsələsidir.
Rusdan imdad uman zehniyyət ifşa olunmasa, o, yenə başqa adlar, başqa maskalarla geri dönəcək.
Bu zehniyyətin kökü kəsilməzsə, dövlətin gələcəyi daim kölgə altında qalacaq.
Bu Millət azadlıq üçün övladlarını qurban edib, can verib, əsla köləliyə razı olmayacaq.
Dövlətin dirçəlişi də, gələcəyi də yalnız Öz ruhuna güvənən insanların əllərindədir.
Xilasımız öz milli ruhumuzun dəyərləri ilə yetişdirilən gələcək nəsillərdədir.
Dövlətin əqidə düsturu millətin övladlarının qanıyla yoğrulub. Dövlətə xəyanət və bu xəyanətə göz yummaq millətə xəyanətdir.
Mübariz Yunus
17:44 17.10.2025
Oxunuş sayı: 21282
