Hər gün tıxaca öyrəşmiş insan kimi davranırıq və…- Nəqliyyat eksperti
Milli Məclisin deputatı Hikmət Məmmədov
parlamentin bugünkü plenar iclasında Azərbaycanda nəqliyyat infrastrukturunun
idarəedilməsi ilə əlaqədar yeni qanunun hazırlanmasını təklif edib.
O qeyd edib ki, qanun layihəsi yol nəqliyyatının,
infrastrukturunun idarəolunmasında iştirak edən müəssisələrin, dövlət
qurumlarının fəaliyyətini koordinasiya etməyə, onların səlahiyyətlərini müəyyənləşdirməyə
xidmət etməlidir:
"Hesab edirəm ki, xüsusilə, Bakı şəhərində nəqliyyat və yol problemi yoxdur. Paytaxtda "butulka effekti" yaradan dar boğazlar problemi var. Bu ünvanlardan biri 20 Yanvar dairəsi, digəri Babək prospektindən Heydər Əliyev prospektinə dönən yolun kəsişməsi, üçüncüsü isə Koroğlu körpüsünün ətrafıdır. Buna bənzər ünvanlarda nəqliyyatın təşkili həyata keçirilsə, effektiv olar. Ümumilikdə isə düşünürəm ki, Bakıda tıxac problemi təsvir edildiyi qədər faciəvi deyil".
Nəqliyyat eksperti Elməddin Muradlı
parlamentarinin səsləndirdiyi fikirlər barədə Crossmedia.az-a danışıb: “Tıxac
problemi ilə bağlı məsələyə obyektiv yanaşsaq, hələ də çıxış yollarımız var. Yəni
vəziyyət o qədər də faciəli deyil. Ancaq bu gün qarşısını almaq üçün müəyyən
addımlar atılmasa, gələcəkdə tıxac problemi ciddi çətinliklər yaradacaq.
Reallıqlardan danışsaq, hərəkətin tənzimlənməsi ilə bağlı addımlar atıldıqca bəzi
hallarda müsbət nəticələr də müşahidə olunur. Biz artıq hər gün tıxaca öyrəşmiş
insan kimi davranırıq və bəzən görürük ki, müəyyən istiqamətlərdə hərəkət tam
da bərbad vəziyyətdə deyil, avtomobillər normal irəliləyir. Amma müəyyən
vaxtlarda, xüsusilə də həftəsonları, şəhərdə böyük sıxlıq yaranır. Məsələn, məktəb
mövsümü açılmazdan əvvəl, yəni tətil dövründə insanlar düşünürdülər ki, tıxac
azalacaq. Lakin bir çox istiqamətlərdə yenə də sıxlıq yaranırdı. Bu halda yol
polisi məcbur olub hərəkətin tənzimlənməsi üçün müdaxilə edirdi”.
Onun sözlərinə görə, bəzən avtobus
zolaqlarına girişə icazə verilir ki, sürücülər rahat hərəkət etsinlər, nəqliyyat
axını davamlı olsun və sıxlıq yaranmasın: “Bu, bir tərəfdən yaxşıdır – nəqliyyatın
hərəkəti təmin olunur. Digər tərəfdən isə pisdir, çünki avtobus zolaqları boş
qalmır. Əsas məsələ budur- proseslər elə tənzimlənsin ki, yol polisi hər dəfə əl
ilə hərəkəti idarə etmək məcburiyyətində qalmasın. Amma hazırda hələ də belə
bir ehtiyac qalır və müəyyən hallarda əl ilə tənzimləmə vacibdir. Hazırda dövlət
proqramı qəbul olunub və cənab Prezident tərəfindən təsdiqlənib. Artıq
proqramın icrasından 9 ay keçir. 2025–2030-cu illər üzrə birinci mərhələnin həyata
keçirilməsi nəzərdə tutulur. Bu mərhələdə yeni metrostansiyaların tikilməsi,
mövcud yolların şaxələndirilməsi və genişləndirilməsi, eləcə də yeni yolların
salınması planlaşdırılır. Bütün bunlar müsbət addımlar kimi qiymətləndirilir və
hesab edilir ki, tıxacla mübarizədə öz müsbət nəticəsini verəcək. Lakin bu işləri
gecikdirmədən görmək vacibdir. Çünki hər bir gecikmə əlavə çətinliklərə və
itkilərə səbəb ola bilər”.
Gülbəniz Bayramova
21:11 30.09.2025
Oxunuş sayı: 9171
