Deputat: Yeni qanun layihəsi himayədar ailə institutunu genişləndirəcək
Azərbaycanda valideyn himayəsindən məhrum olmuş uşaqlar üçün mühüm addımlar atılıb.
Crossmedia.az xəbər verir ki, bunu Milli Məclisin Elm və təhsil komitəsinin bu gün keçirilən iclasında “Valideynlərini itirmiş və valideyn himayəsindən məhrum olmuş uşaqların sosial müdafiəsi haqqında” qanun layihəsinin müzakirəsində deputat Elnarə Akimova deyib.
Deputat bildirib ki, hələ görüləcək işlər çoxdur: “Bu qanun layihəsinin təsdiqini olduqca əhəmiyyətli hesab edirəm. Çünki valideynini itirmiş uşaqlara deyil, valideyn himayəsindən məhrum olmuş uşaqlara şamil ediləcək bütün imtiyazları nəzərdə tutur. Bəzən valideynlərin bioloji varlığı heç bir qayğı göstərmədiyi halda əngələ çevrilir. Halbuki həmin uşağı himayəyə götürərək sevgi göstərən ailələr, insanlar ola bilər ki, bu qanun məhz onların öz münasibətinin rahat tənzimlənməsinə imkan yaradacaq. Bu qanun məhz himayədar ailə institutunu genişləndirəcək, valideyn himayəsindən məhrum uşaqların ailə mühitində böyüməsinə şərait yaradacaq”.
14:12 26.09.2025
Oxunuş sayı: 3001
