İnhisarçılıq!: Parlamentdə bu məsələ ciddi müzakirə olunmalıdır
Müasir demokratik cəmiyyətlərdə vətəndaşların bərabər hüquqlara malik olması və azad sahibkarlıq mühitində fəaliyyət göstərməsi dövlətin əsas vəzifələrindən biridir. Azərbaycan Respublikasının Konstitusiyası da bu prinsipləri təsbit edərək hər bir şəxsin bərabərlik və azad sahibkarlıq hüquqlarını təmin edir. Lakin bəzi hallarda tətbiq olunan idarəetmə və iqtisadi mexanizmlər vətəndaşların hüquqlarının məhdudlaşdırılmasına, rəqabət mühitinin pozulmasına səbəb ola bilir. Azərbaycanın İnsan Hüquqları üzrə Müvəkkili (Ombudsman) Aparatının Heydər Əliyev adına Beynəlxalq Hava Limanında taksi xidmətləri sahəsində apardığı monitorinq də məhz bu məsələlərə diqqət yönəldir. Monitorinqin nəticələri göstərir ki, yeni tarif siyasəti həm sərnişinlərin seçim imkanlarına, həm də lisenziyalı sürücülərin fəaliyyətinə mənfi təsir göstərərək konstitusion hüquqların pozulmasına gətirib çıxarır.
Mövzu ilə bağlı Crossmedia.az-a açıqlamasında Ağ Partiya sədri Tural Abbaslı bildirib ki, bu təklifə münasibət birmənalı şəkildə mənfidir və inhisarçılıq elementləri daşıyır:
“Bu, inhisarçılıqdır- əhalinin ziyanına olan inhisarçılıqdır. Məsələn, dövlət və ya hansısa dövlət qurumları müəyyən sahəni inhisara alır ki, bu da vətəndaşların maraqları naminə – daha ucuz, daha keyfiyyətli, daha əlçatan olsun deyə – bəzi ölkələrdə nadir hallarda dövlət inhisarı ola bilir. Təəssüf ki, bizdə belə nümunələr yoxdur. Amma Azərbaycanda əhalinin gəliri, minimum əməkhaqqı bəllidir. Belə bir zamanda aeroportdan şəhərin hər hansı bir yerinə 30–50 manata getmək heç də səmərəli deyil. Bu, turistlər üçün də uyğun deyil. Çünki istənilən ölkəyə turist gedəndə onu taksilər aldatmasın deyə proqram tətbiqlərindən istifadə edir. Orada məsafə və məbləğ əvvəlcədən göstərilir".
Partiya sədri hesab edir ki, aeroport rəhbərliyinin bu addımı hüquqi əsasları sual altında olan bir monopoliyaya çevrilmə cəhdidir: “İndi aeroport rəhbərliyi öz səlahiyyətlərindən istifadə edərək – bunun hüquqi zəminə malik olub-olmaması başqa məsələdir – bir monopoliyaya çevrilməyə çalışır, özündən tariflər müəyyən etməyə çalışır. Halbuki tariflər dövlət tərəfindən müəyyən olunur. Düşünürəm ki, parlamentdə bu məsələ müzakirə olunmalıdır. Bunun qanun layihəsi ilə tənzimlənməsi isə bir qədər çətindir. Çünki qanun qəbul edib nə deyəcəklər ki, bu məhdudiyyəti etməməlidirlərmi? Amma hər halda Milli Məclisin, deputatların və spikerin mövqeyinin olması belə lüzumsuz qərarların qəbulunu əngəlləyə bilər".
T. Abbaslının sözlərinə görə, qanunvericilikdə bu qadağaların tətbiqini konkretləşdirmək çətin olsa da, parlamentin mövqeyi həlledici ola bilər: “Elə məsələlər var ki, onlar qanunvericiliklə yox, hansısa qurumların daxili sərəncamları ilə tənzimlənir. Amma istənilən halda qanunverici orqanın rəhbərliyinin bu məsələ ilə bağlı mövqeyi təsir etməlidir. Çünki parlament deputatları bəlkə də dövlətin yeganə təmsilçiləridir ki, xalqla ünsiyyətdə olurlar, seçkilərlə görüşlər keçirirlər, problemləri dinləyirlər. Yəni onlar digər məmurlara nisbətən xalqın vəziyyətindən daha çox xəbərdardırlar. Dövlət və hökumət də bu rəyi nəzərə almalıdır".
Mehriban Yariyeva
11:46 26.09.2025
Oxunuş sayı: 8560
