Gündəm

İlham Əliyev BMT-də Azərbaycanın strateji mövqeyini dünyaya göstərdi - Deputat

Prezident İlham Əliyev Birləşmiş Millətlər Təşkilatının 80-ci sessiyasında iştirak edərək beynəlxalq ictimaiyyət qarşısında mühüm çıxışlar edib. Dövlət başçısı çıxışlarında Azərbaycanın strateji mövqeyini, regiondakı nəqliyyat dəhlizlərinin əhəmiyyətini və ölkəmizin beynəlxalq əməkdaşlıqlarını diqqət mərkəzinə gətirib. İlham Əliyev həm regional iqtisadi inteqrasiyanın, həm də qlobal nəqliyyat və logistika şəbəkələrində Azərbaycanın rolunun artırılmasının vacibliyini vurğulayıb.Bu çıxışları həm diplomatik, həm də iqtisadi baxımdan ölkəmiz üçün yeni imkanların açılması baxımından mühüm addım kimi qiymətləndirirlər.

Mövzu ilə bağlı Crossmedia.az-a açıqlama verən Milli Məclisin deputatı Müşfiq Məmmədli bildirib: “Ümumiyyətlə, Azərbaycanın son dövrlərdə, xüsusən nəqliyyat dəhlizlərinin və regionda iqtisadi əməkdaşlığın sürətlənməsi sahəsində atdığı addımlar artıq beynəlxalq media nümayəndələrinin də diqqətini cəlb edir. Demək olar ki, həm region ölkələri arasında keçirilən görüşlər, həm də Azərbaycanın Avropa ölkələri, xüsusilə enerji təhlükəsizliyində yaxından əməkdaşlıq etdiyi Yunanıstan və İtaliya kimi ölkələr, eləcə də Ərəb ölkələri ilə münasibətləri, yeni texnologiyalardan və yaşıl texnologiyalardan istifadə istiqamətində aparılan danışıqlar, həm Azərbaycanda, həm də BMT sessiyası səviyyəsində aktiv şəkildə müzakirə olunur. Bu baxımdan Azərbaycan, cənab Prezidentin siyasəti nəticəsində enerji habına çevrilmə istiqamətində mühüm addım atıb".

Müşfiq Məmmədli həmçinin qeyd edib: “Cənab Prezidentin çıxışlarında həm siyasi iradənin olması, həm də Azərbaycan iqtisadi potensialının əməkdaşlıq etməkdə maraqlı olan ölkələr qarşısında ortaya qoyulması diqqət çəkir. BMT sammitində iştirak artıq qalib Azərbaycan dövlətinin mövqeyini göstərdi. Xüsusilə Birinci vitse-prezident Mehriban Əliyevanın paylaşdığı video görüntülərdə də aydın görünür ki, Prezident Trampın çıxışlarından sonra regionda sülhün təmin olunması və nəqliyyat dəhlizlərinin açılmasında ABŞ-ın rolunu xüsusi qeyd etdi. Azərbaycanın bu prosesdə həm təşəbbüskar, həm də sürətləndirici rol oynayan ölkə olduğunu bir daha sübut etmiş oldu".

Mehriban Yariyeva

🖨 Çap et

21:24 24.09.2025

Oxunuş sayı: 17255