Suriya Prezidenti: “Colan təpələri işğal altında olduğu halda, Avraam Razılaşmalarına qoşula bilmərik”
Suriya Prezidenti Əhməd əş-Şəraa İsraillə münasibətlərə dair sualı cavablandırarkən bildirib ki, İsrail hələ də Golan təpələrini işğal altında saxlayır və bu ərazilər BMT tərəfindən də Suriya torpağı kimi tanınır. Onun sözlərinə görə, Avraam Razılaşmalarına qoşulan ölkələr İsrailə torpaq itirməyib, onunla qonşu deyillər və sərhəd problemləri yoxdur.
Crossmedia.az bildirir ki, dövlət başçısı İsrailin Suriyaya qarşı minə yaxın hava hücumu həyata keçirdiyini, həmçinin 400-dən çox hərbi əməliyyat keçirdiyini, nəticədə insanların həbsi və qətli ilə yanaşı mülki və hərbi obyektlərin dağıdıldığını qeyd edib. O əlavə edib ki, hətta prezident sarayı belə iki dəfə ardıcıl olaraq hücuma məruz qalıb ki, bu da yalnız düşmənçilik aktı kimi qiymətləndirilə bilər.
Əş-Şəraa vurğulayıb ki, Suriya rəhbərliyi yeni müharibəyə sürüklənməmək üçün vəziyyəti nəzarətdə saxlamağa çalışır. Bu, zəiflik deyil, əksinə, ölkənin bərpa və inkişaf imkanlarına diqqət yönəltmək üçün atılmış addımdır. Prezident həmçinin bildirib ki, hazırda ərəb və islam ictimaiyyəti Qəzzada baş verənlərdən dərin narazıdır və Suriya hökuməti də xalqın səsinə həssas qalmalıdır.
O qeyd edib ki, sülh yalnız hökumətlər arasında deyil, xalqlar arasında da qəbul olunarsa davamlı ola bilər. Bu səbəbdən Avraam Razılaşmaları və digər tarixi sülh müqavilələrinin nəticələrinin yenidən qiymətləndirilməsinə ehtiyac var.
Suriya lideri bəyan edib: “Top artıq İsrailin və beynəlxalq ictimaiyyətin tərəfindədir. Əsas məsələ budur: İsrail həqiqətənmi təhlükəsizlik narahatlıqları ilə yaşayır, yoxsa ekspansionist ambisiyaları davam etdirir? Bunun cavabı yalnız İsrailin gələcəkdə razılaşdırılacaq hər hansı razılaşmanın şərtlərinə sadiqliyi ilə bəlli olacaq”.
20:45 23.09.2025
Oxunuş sayı: 5703
