Aİ Rusiyaya qarşı 19-cu sanksiyalar paketini təsdiqlədi
Avropa Komissiyasının rəhbəri Ursula fon der Lyayen Rusiyaya qarşı Avropa İttifaqının (Aİ) 19-cu sanksiyalar paketinin razılaşdırıldığını elan edib.
Crossmedia.az bildirir ki, yeni məhdudiyyətlərə əsasən 2027-ci ilin yanvarından etibarən Rusiyadan maye qaz (SPG) idxalı tamamilə dayandırılacaq. Bununla yanaşı, “Rosneft” və “Qazprom neft” şirkətlərinə əvvəlki istisnalar ləğv olunur. “Kölgə donanması”na qarşı sanksiyalar 560-dan çox gəmiyə şamil ediləcək.
Sanksiyalar paketi həmçinin Rusiya bankları və maliyyə qurumları ilə bütün tranzaksiyaların qadağan edilməsini, sürətli ödənişlər sisteminə qarşı məhdudiyyətləri, müdafiə sənayesi ilə bağlı xüsusi iqtisadi zonalara (XİZ) investisiyalara qadağanı və süni intellekt, geoinformasiya texnologiyaları kimi sahələrdə Rusiya üçün texnoloji məhdudiyyətləri nəzərdə tutur.
Qeyd edək ki, 3 sentyabrdan etibarən Rusiya neftinə 47,6 dollar/barrel qiymət həddi tətbiq olunub. Aİ həmçinin üçüncü ölkələrdəki şirkətlərin sanksiyaları pozaraq Rusiya neftini almasına məhdudiyyətlər qoymağı planlaşdırır.
10:29 20.09.2025
Oxunuş sayı: 4270
