Həkimdən xəbərdarlıq: "Epidemik vəziyyət xeyli qarışıqdır"
Səhiyyə Nazirliyi uşaqlar arasında yayılan xəstəliklərlə bağlı açıqlama verib. Qurumdan bildirilib ki, yoluxucu xəstəliklərlə bağlı səhiyyə müəssisələrinə müraciətlərdə ciddi artım müşahidə olunmur. Uşaqlarda müşahidə olunan hallar əsasən yüngül keçir və qısa müddətdə sağalma ilə nəticələnir. Nazirlik valideynləri uşaqların gigiyenasına, düzgün qidalanmasına və günvurma riskinə qarşı diqqətli olmağa çağırıb.
Son günlər bəzi ailələrdə narahatlıq yaransa da, Səhiyyə Nazirliyinin açıqlaması vəziyyətin nəzarətdə olduğunu göstərir. Bu cür hallarda əsas məsuliyyət valideynlərin üzərinə düşür – gigiyena və düzgün rejimlə bir çox risklərdən qorunmaq mümkündür. Mövsümi xəstəliklərin artmaması üçün profilaktik tədbirlər vaxtında görülməlidir.
Mövzu ilə bağlı Tibb elmləri doktoru, professor Adil Qeybulla Crossmedia.az-a açıqlama verib.
Səhiyyə eksperti hazırda epidemik vəziyyətin xeyli qarışıq olduğunu söyləyib: "Hazırda epidemik vəziyyət xeyli qarışıqdır. Bir tərəfdən COVİD-19 pandemiyası bitsə də, omikron ştamının mutasiya variantları, digər tərəfdən rotaviruslar, bir müddət qızılcanın xeyli geniş yayılması müşahidə olunurdu. Həmçinin metapnevmavirusun, qripin yayılması və s. çox saylı qarışıq situasiyalar aktiv olduğu dövrdür. Hətta son zamanlar uşaqlar arasında xəstəliklər də artıb. Əsasən periferik və polineyropatiya xəstəlikləri üstünlük təşkil edir. Uşaqlarda halsızlıq, ümumi zəiflik əlamətləri ilə aşkarlanan virus xəstəlikləri geniş yayılmışdır. Rotavirusa daxil olan işləmə, qusma və s. viruslar da kəskin yayılır. Belə bir qarışıq vəyiyyət hazırda hökm sürür”.
Professor açıqlamasında bu kimi hallarda valideynlərə diqqət etməli olduqları məqamlardan danışıb: “Valideynlər əsasən bəzi məsələlərə diqqət etməlidir. Uşaq xəstələnsə, dərhal temperaturu salmağa ehtiyac yoxdur. Temperatur əgər tezliklə yüksəlməyə doğru gedirsə, o zaman qızdırmanı aşağı salmaq üçün şamlardan, dərman preparatlarından istifadə etmək olar, lakin qızdırma qalxmayıbsa və qalxmağa meyilli deyilsə onu salmağa tələsmək lazım deyil. Bu orqanizmin virusa rekasiyasıdır. Digər bir diqqət olunmalı məsələ xəstələnmiş uşağa çox maye verilməsidir. Xəstələnmiş uşağın sinəsini "Doktor mom" ilə ovuşdurmaq, bədən nahiyələrində yoddan istifadə etmək olar. Və birdə qusma, ishal halları olan uşaqlara dehidrol məhlulu vermək yaranan susuzlaşamnın qarşısını almağa kömək edir. Yataq rejimi isə ən vacib məsələdir. Təəssüflər olsun ki, valideynlər bəzən ciddi nəzarət etmədikləri üçün uşaqların vəziyyəti ağırlaşdıqda xəstəxanalara müraciət edirlər. Qalan bütün məsələlər isə tam şəkildə həkim nəzarətində olmalıdır”.
Nicat Rüstəmzadə
14:22 25.07.2025
Oxunuş sayı: 10633
